މެރި ކަލްޗާގެ ދާއިރާއިން ރާއްޖޭގައި އިންވެސްޓްކުރުމުގެ ދައުވަތު ޗައިނާގެ އިންވެސްޓަރުންނަށް އަރުވައިފި އެވެ.
އެ ދާއިރާއިން ރާއްޖޭގައި އިންވެސްޓްކުރުމުގެ ދައުވަތު އަރުވާފައިވަނީ ފިޝަރީޒް މިނިސްޓަރު އަހުމަދު ޝިޔާމް ޗައިނާއަށް މިހާރު ކުރައްވަމުން ގެންދަވާ ދަތުރުގައި ޗައިނާ އިންޓަނޭޝަނަލް ޑިވެލޮޕްމަންޓް ކޯޕަރޭޝަން އެޖެންސީ (ސީއައިޑީސީއޭ) ގެ ޗެއާމަން ލުއާ ޖައުހުއީ އާއެކު ބޭއްވި ބައްދަލުވުމުގައެވެ.
މި ބައްދަލުކުރެއްވުމުގައި މިނިސްޓަރު ޝިޔާމް ވަނީ ރާއްޖޭގައި މެރި ކަލްޗާ ކުރިއެރުވުމަށް ގިނަ ފުރުސަތުތަކެއް ހުރިކަން ފާހަގަކުރައްވާފަ އެވެ.
މެރި ކަލްޗާ ދާއިރާއިން މީހުން ތަމްރީން ކުރުމަށާއި ޓެކްނޮލޮޖީގެ އެހީތެރިކަން ބޭނުންވާ ކަމަށް މިނިސްޓަރު ޝިޔާމް މި ބައްދަލުކުރެއްވުމުގައި ވިދާޅުވި އެވެ.
މި ބައްދަލުކުރެއްވުމުގައި މިނިސްޓަރު ޝިޔާމް ވަނީ މަސްވެރިކަން ކުރިއެރުވުމަށް ސަރުކާރުން ކުރަމުންދާ މަސައްކަތްތައް ހިއްސާކުރައްވާފަ އެވެ.
މެރި ކަލްޗާގެ ދާއިރާ ފެށުމަށް ރާއްޖޭގައި ހަތަރު ސަރަހައްދެއް މިހާރު ވަނީ ކަނޑައަޅާފަ އެވެ.