ދުނިޔޭގެ 20 ގައުމެއްގެ އެންމެ މޮޅު ޓީމުތަކުގެ މެދުގައި ބޭއްވި ރެޑްބުލް ހާފްކޯޓް ވޯލްޑް ފައިނަލްސް ބާސްކެޓްބޯޅަ މުބާރާތުގައި ރާއްޖެއިން މިއަހަރު ކާމިޔާބީތަކެއް ހޯދައިފި އެވެ.
ނިއުޔޯކް ސިޓީގެ ބްރޫކްލިން ބްރިޖް ޕާކްގައި މި މަހުގެ 19 އަދި 20 ވަނަ ދުވަހު ބޭއްވި މި މުބަރާތުގައި ރާއްޖެއިން މިދިޔަ އަހަރަށް ވުރެ ރަނގަޅު ނަތީޖާއެއް ހޯދި އެވެ. އެގޮތުން ފުރަތަމަ މެޗުގައި މޯލްޑޯވާ ބަލިކޮށް އަލަށް ރާއްޖެއަށް ކާމިޔާބެއް ހޯދުނެވެ.
ރާއްޖެ ހިމެނުނު ގްރޫޕްގައި އިތުރަށް ހިމެނުނީ ބެލްޖިއަމް އަދި އެމެރިކާ އެވެ. މި ދެ ޓީމާ އެކު ކުޅުނު މެޗުތަކުގައި ރާއްޖެ ބަލިވި ނަމަވެސް ރަނގަޅު ކުޅުމެއް ދެއްކި އެވެ.
މި އަހަރުގެ މުބާރާތުގެ ފައިނަލްގައި އެމެރިކާ ބަލިކުރުމަށްފަހު ޗެމްޕިއަންކަން ހޯދީ ސާބިއާ އެވެ.
މީގެ އިތުރުން މި މުބާރާތުގެ ތެރެއިން ބޭއްވި ތުރީ ޕޮއިންޓް މުބާރާތުގައި ރާއްޖޭގެ މަފާޒް މުހައްމަދު ވަނީ އެންމެ މޮޅު ފަސް ކުޅުންތެރިންގެ ތެރޭގައި ހިމެނިފަ އެވެ.
ރާއްޖޭގެ ޗެމްޕިއަން "އަންރޭކްޑް" ޓީމުގައި ހިމެނެނީ މަފާޒް މުހައްމަދާއި، އިސްމާއީލް ފަރުހާން، އިބްރާހިމް ނަސީމް އަދި މުހައްމަދު ސަބީހް ތައުފީގު އެވެ.
މި ޓީމު ރާއްޖެ އައުމުގެ ކުރިން ސްޕޮންސަރުންގެ އެހީގައި 10 ދުވަހުގެ ޓްރޭނިން ކޭމްޕެއްވެސް ފުރިހަމަ ކުރާނެ އެވެ.