ދެ ލޯންޗް ޖެހި ރޭ ހިނގި ނުރައްކާތެރި އެކްސިޑެންޓުގައި އަނިޔާވި މީހުންގެ ތެރެއިން ދެ މީހަކަށް އައިސީޔޫގައި ފަރުވާ ދެމުން އަންނަ ކަމަށް އައިޖީއެމްއެޗް އިން ބުނެފި އެވެ.
އައިޖީއެމްއެޗް އިން ބުނީ ލޯންޗް އެކްސިޑެންޓްގައި އަނިޔާވެގެން 20 މީހަކު އެ ހޮސްޕިޓަލަށް ރޭ ގެންދިޔަ ކަމަށެވެ.
މީގެތެރެއިން ދެ މީހުން ފިޔަވާ އެންމެން ދޫކޮށްލާފައިވާ ކަމަށާއި ހޮސްޕިޓަލްގައި އޮތް ދެ މީހުން އޮތީ އައިސީޔޫގައި ކަމަށްވެސް ހޮސްޕިޓަލް އިން ބުންޏެވެ.
ގުޅީފަޅު ކައިރިން ދެ ލޯންޗު ޖެހި އެކްސިޑެންޓް ހިނގާފައިވަނީ ރޭ 7:34 ހާއިރު ކަމަށް ފުލުހުން މައުލޫމާތު ދީފައިވެ އެވެ.
ސޯޝަލް މީޑިއާގައި ފުލުހުން އާއްމުކުރި ފޮޓޯއިން ފެންނަ ގޮތުގައި އެކްސިޑެންޓުވި އެއް ލޯންޗަކީ ގްރޭންޑް ޕާކް ކޮއްދިއްޕަރު ރިސޯޓުގެ ލޯންޗެކެވެ. އެ ލޯންޗުގެ ކުރިމައްޗާއި ދެ އަރިމައްޗަށް ބޮޑެތި ގެއްލުންތަކެއް ވަނީ ލިބިފަ އެވެ.