ލާ ލީގާގެ މި ސީޒަންގެ ފުރަތަމަ އެލް ކްލެސިކޯ މެޗު މިރޭ ރިއާލް މެޑްރިޑްގެ ބާނަބާއު ސްޓޭޑިއަމްގައި ކުޅެން ޖެހިފައިވާއިރު، މިއީ ފަހުގެ ތާރީހެއްގައި މި ދެ ޓީމު ކުޅޭ އެންމެ ވާދަވެރި މެޗުތަކުގެ ތެރެއިން އެއް މެޗަށް ވެގެންދާނެކަން ޔަގީނެވެ.
ލީގު ތާވަލުގެ އެއްވަނައިގައި އޮތް ބާސެލޯނާ އާއި ދެވަނައިގައި އޮތް ރެއާލް މެޑްރިޑްއާ ދެމެދު މިވަގުތު އޮތީ އެންމެ ތިން ޕޮއިންޓުގެ ފަރަގެކެވެ. މިރޭގެ މެޗުން މެޑްރިޑަށް މޮޅުވެވިއްޖެނަމަ، ޕޮއިންޓު ތާވަލުގައި ބާސެލޯނާއާ އެއްހަމައަށް އަރާނެ އެވެ.
ހާންސި ފްލިކްގެ ދަށުން މޮޅު ފޯމެއްގައި މި ސީޒަން ފަށާފައިވާ ބާސެލޯނާ އިން ވަނީ ލީގުގައި ކުޅުނު 10 މެޗުގެ ތެރެއިން 9 މެޗުން މޮޅުވެފަ އެވެ. އަދި 33 ލަނޑު ޖަހައި، ލީގުގައި އެންމެ ގިނަ ލަނޑު ޖަހާފައިވާ ޓީމަކީވެސް ބާސެލޯނާ އެވެ.
އެހެންނަމަވެސް ދެވަނައިގައި އޮތް ރެއާލް މެޑްރިޑަކީ މި ސީޒަންގައި އަދި އެއްވެސް މެޗަކުން ބަލިވެފައި ނުވާ ޓީމެކެވެ.
އެންމެ ފަހުން މެޑްރިޑް ބަލިވެފައިވަނީ މީގެ އެއް އަހަރު ކުރިން އެތްލެޓިކޯ މެޑްރިޑާ ދެކޮޅަށެވެ. މިރޭގެ މެޗުން ބަލިނުވެއްޖެނަމަ، 2017 ވަނަ އަހަރު ބާސެލޯނާއިން ހަދާފައިވާ ލީގުގައި 43 މެޗުން ބަލިނުވުމުގެ ރެކޯޑާ އެއްވަރުވާނެ އެވެ.
މި ސީޒަންގައި ބާސެލޯނާގެ ޔަމާލް އަދި ރަފީނިޔާ ދަނީ މޮޅު އާދި ތަފާތު ކުޅުމެއް ދައްކަމުންނެވެ. ޔަމާލް ވަނީ 4 ލަނޑާއި 6 އެސިސްޓް ހަދާފައިވާއިރު، ރަފީނިޔާގެ ނަމުގައި 5 ލަނޑާއި 5 އެސިސްޓް ވަނީ ރެކޯޑުކުރެވިފަ އެވެ. މެޑްރިޑްގެ ފަރާތުން ވިނީޝިއަސް 5 ލަނޑާއި 4 އެސިސްޓް ހަދާފައިވާއިރު، އެމްބާޕޭ ވަނީ 6 ލަނޑާއި 1 އެސިސްޓް ހަދާފަ އެވެ.
އަނިޔާގެ ސަބަބުން މިރޭގެ މެޗުގައި މެޑްރިޑްގެ ކޯޓުވާ، ކަރަވަހާލް އަދި ރޮޑްރީގޯއަށް ނުކުޅެވޭނެ އެވެ. އަދި ބާސެލޯނާގެ ޓާ ސްޓެގަން އާއި އަރައުހޯ އަށް ވެސް މެޗު ގެއްލޭނެއެވެ.
ފާއިތުވި ތިން އެލް ކްލެސިކޯ މެޗު ކާމިޔާބުކޮށްފައިވަނީ މެޑްރިޑުންނެވެ. އަދި މިދިޔަ ސީޒަންގެ ލީގާއި ޗެމްޕިއަންސް ލީގުގެ ޗެމްޕިއަންކަން ހޯދާފައިވަނީވެސް މެޑްރިޑުންނެވެ. މިއާ ޚިލާފަށް ބާސެލޯނާއަށް ވޭތުވެދިޔަ ފަސް އަހަރު ލީގު ކާމިޔާބުކުރެވިފައިވަނީ އެންމެ ފަހަރެކެވެ. އެހެންކަމުން މިރޭގެ މެޗަށް ބާސެލޯނާއިން ނިކުންނާނީ ސީދާ މޮޅަކަށް ކަމަށް ޤަބޫލުކުރެވެއެވެ.
ރާއްޖެ ގަޑިން މެންދަމު 12:00 ގައި ފެށޭ މިމެޗަކީ ހުރިހާ ގޮތަކުން ބެލިޔަސް ވަރަށް ފޯރިގަދަވާނެ މެޗެއް ކަމަށް ބެލެވެ އެވެ.