ސްޕެނިޝް ލީގުގައި ރޭ ކުޅުނު އެލް ކްލާސިކޯގައި އަމިއްލަ ދަނޑު ބަރުނަބިއުގައި ރެއާލް މެޑްރިޑް ވަނީ ވާދަވެރި ބާސެލޯނާ އަތުން 4-0 ގެ ތަފާތަކުން ލަދުވެތި ބައްޔަކާއި ކުރިމަތިލާންޖެހިފަ އެވެ.
މެޗުގެ ފުރަތަމަ ހާފުގައި ދެ ޓީމަށްވެސް ގޯލެއް ނުޖެހުނެވެ. ނަމަވެސް ދެވަނަ ހާފުގައި ބާސެލޯނާގެ ފޯވަޑް ރޮބަޓް ލެވަންޑޯސްކީ ވިދިވިދިގެން ޖެހި ދެ ގޯލާއެކު ބާސެލޯނާ އިން ކުރި ހޯދި އެވެ.
ލެވަންޑޯސްކީ ފުރަތަމަ ގޯލު ޖެހީ 54 ވަނަ މިނެޓް ގައެވެ. އަދި އޭގެ ދެ މިނެޓު ފަހުން ދެވަނަ ގޯލު ޖެހި އެވެ.
މެޗުގެ 77 ވަނަ މިނެޓުގައި 17 އަހަރުގެ ޒުވާން ކުޅުންތެރިޔާ ލަމީން ޔަމާލް ވަނީ އެލް ކްލާސިކޯގެ ތާރީޚުގައި ގޯލު ޖެހި އެންމެ ހަގު ކުޅުންތެރިޔާގެ ރެކޯޑު ހަދާފަ އެވެ. ރަފީނިއާ އޭނާއަށް ދިން ރީތި ޕާހަކުން އެ ގޯލު ޖެހިއިރު ޔަމާލްގެ އުމުރަކީ 17 އަހަރާއި 106 ދުވަހެވެ.
މެޗު ނިމުމުގެ 6 މިނެޓު ކުރިން ރަފީނިއާ މި މެޗުގެ ހަތަރުވަނަ ގޯލް ޖަހާފަ އެވެ.
މި މޮޅާއެކު ލީގު ތާވަލުގައި ބާސެލޯނާ ވަނީ 11 މެޗުން 30 ޕޮއިންޓާއެކު އެއްވަނައަށް އަރާފަ އެވެ. ދެވަނައިގައި އޮތް ރެއާލް މެޑްރިޑަށް ވަނީ 11 މެޗުން 24 ޕޮއިންޓް ލިބިފަ އެވެ.
ހަންސީ ފްލިކްގެ ދަށުން ރަނގަޅު ކުޅުމެއް ދައްކަމުންދާ ބާސެލޯނާ އިން ވޭތުވެދިޔا ހަފްތާގެ ތެރޭގައި ބަޔާން މިއުނިކް އަދި ރެއާލް މެޑްރިޑް ވަނީ ބަލިކޮށްފަ އެވެ.