ނޮޅިވަރަންފަރުގެ ހައުސިން ޔުނިޓުތައް ލިބޭ މީހުންގެ ވަގުތީ ލިސްޓު ބާތިލުކުރުމަށް އެޗްއާރްސީއެެމް އިން އަންގައިފި އެވެ.
އެޗްއާރްސީއެމް އިން ނެރުނު ބަޔާނެއްގައި ބުނެފައިވަނީ ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ނޮޅިވަރަންފަރުގައި އިމާރާތްކުރި 100 ހައުސިން ޔުނިޓް ދޫކުރުމަށް ހަމަޖެހިފައިވާ އުސޫލުގައި ރައްޔިތުން ކަންބޮޑުވާ ކަންތައްތަކެއް ހުރި ކަމަށް ބުނެ 279 މީހަކު ސޮއިކޮށްފައިވާ ޕެޓިޝަނެއް އެ ކޮމިޝަނަށް ލިބިފައިވާ ކަމަށެވެ.
ޝަކުވާތަކާ ގުޅިގެން އެކަމުގެ ހަގީގަތް ހޯދުމަށް އެޗްއާރްސީއެމް އިން ވަނީ ތަހުގީގެއްވެސް ކުރިއަށް ގެންގޮސްފަ އެވެ.
އެޗްއާރްސީއެމް އިން ބުނީ ހައުސިން ޔުނިޓްތައް ދޫކުރުމަށް މިހާރު ކަނޑައަޅާފައިވާ އުސޫލުގެ ދަށުން ޔުނިޓުތައް ދޫކޮށްފިނަމަ، އެކަމަށް އެދި ހުށަހަޅާފައިވާ މީހުންނަށް ގާނޫނުއަސާސީ އާއި ގާނޫނުތަކުން ކަށަވަރުކޮށްދީފައިވާ ހައްގުތައް ގެއްލިގެން ދިއުމުގެ ފުރުސަތު ވަރަށް ބޮޑަށް އެބައޮތް ކަން ތަހުގީގުން އެނގިފައިވާ ކަމަށެވެ.
މައްސަލަ ޖެހިގެން އުޅޭ އުސޫލު އިސްލާހުކޮށް މިހާރު ފޯމު ހުށަހަޅާފައިވާ މީހުންގެ ފޯމުތައް އަލުން އިވެލުއޭޓް ކުރުމަކީ އެންމެ އިންސާފުވެރިވާނެ ގޮތް ކަމަށް އެޗްއާރްސީއެމް އިން ބުންޏެވެ. އެހެންކަމުން ވަގުތީ ފްލެޓް ލިސްޓު ބާތިލުކޮށް، އާ އުސޫލެއް އެކުލަވާލުމަށް ނޮޅިވަރަންފަރު ކައުންސިލަށް އެޗްއާރްސީއެމް އިން ވަނީ އަންގާފަ އެވެ.
އެޗްއާރްސީއެމްގެ އެންގުމާ އެއްގޮތަށް އަމަލުނުކޮށްފިނަމަ އެ ކޮމިޝަންގެ ގާނޫނުގެ ދަށުން ފިޔަވަޅު އަޅާނެ ކަމުގެ އިންޒާރުވެސް ދީފައިވެ އެވެ.