އުތުރު ޕްރޮވިންސްގެ ދަތުރުފަތުރުގެ ހިދުމަތް ދިނުމަށް ދީބާޖާ އިންވެސްޓްމަންޓާއެކު ވެފައިވާ އެއްބަސްވުން އުވާލުމާ ގުޅިގެން، އެ ކުންފުންޏަށް ދީފައިވާ 64 މިލިއަން ރުފިޔާގެ ބަދަލަކީ ދޭންނުޖެހޭ ފައިސާއެއް ކަމަށް އޮޑިޓާ ޖެނެރަލްގެ އޮފީހުން އާންމުކުރި ހާއްސަ އޮޑިޓް ރިޕޯޓުގައި ބުނެފި އެވެ.
އޮޑިޓް ރިޕޯޓުގައި ފާހަގަކޮށްފައިވާ ގޮތުގައި މި ބަދަލު ކަނޑައެޅުމުގައި ކުންފުނިން ކޮށްފައިވާ ހަރަދުތަކާއި، ވިޔަފާރީގެ މާލީ ހިސާބުތަކަށް އަދި އެއްބަސްވުމުގެ ދަށުން ލިބުނު އެހެނިހެން މަންފާތަކަށް ރިއާޔަތްކޮށްފައެއް ނުވެ އެވެ.
މީގެ އިތުރުން ކުންފުނިން ކެޕިޓަލް އިންވެސްޓްމަންޓްގެ ގޮތުގައި ނަގައިދީފައިވާ 14.7 މިލިއަން ރުފިޔާގެ ތެރެއިން 11.9 މިލިއަން ރުފިޔާއަކީ އެހެން ކުންފުންޏަކާއެކު ފެރީ އުޅަނދު ބަނުމަށް ވެފައިވާ އެއްބަސްވުމެއްގެ ޖުމުލަ އަގުކަން ފާހަގަކޮށްފައިވެ އެވެ.
ރިޕޯޓުގައި ފާހަގަކޮށްފައިވާ އެންމެ މުހިންމު ކަމަކީ ދަތުރުފަތުރުގެ އެއްބަސްވުމުގެ ދަށުން ދީބާޖާއަށް ސަބްސިޑީގެ ގޮތުގައި ދޫކުރި ރ. ކުޑަކުރަތު ރިސޯޓް 65.5 މިލިއަން ރުފިޔާއަށް ވިއްކާލައިގެން ލިބުނު މަންފާ، އެއްބަސްވުން އުވާލުމުން ލިބުނު ގެއްލުމަށްވުރެ ބޮޑުވުމެވެ. އެހެންކަމުން އިތުރު ބަދަލެއް ދޭންޖެހޭނެ ކަމަކަށް އޮޑިޓާ ޖެނެރަލް ނުދެކެ އެވެ.
އޮޑިޓް ރިޕޯޓުގައި ވަނީ ދީބާޖާއަށް ދީފައިވާ ފައިސާ އަނބުރާ ހޯދުމަށާއި މި ފައިސާ ދިނުމުގައި ޒިންމާވާ ފަރާތްތަކާ މެދު ފިޔަވަޅު އެޅުމަށް ތަހުގީގު ކުރުމަށް އަންގާފަ އެވެ.