ލޯނު ނުދެއްކުމުން ރީކޯ މޫސާ މަނިކުގެ ހެވީލޯޑް ކުންފުނީގެ ތިން ރަށެއް ވިއްކާލުމަށް ބެންކް އޮފް މޯލްޑިވްސް (ބީއެމްއެލް) އިން އިއުލާނުކޮށްފި އެވެ.
ބީއެމްއެލް އިން ކުރި އިއުލާނެއްގައި ބުނީ ހެވީ ލޯޑް މޯލްޑިވްސްގެ ނަމުގައި ނެގި ލޯނަކަށް ފައިސާ ދައްކާފައި ނުވާތީ އެ ކުންފުނީގެ ތިން ރަށެއް ވިއްކާލުމަށް އިއުލާން ކުރީ ކަމަށެވެ.
ވިއްކާލާ ތިން ރަށަކީ ލ. ފަރެސް އައިލެންޑާއި، ކުޑަ ފަރެސް އައިލެންޑް އަދި ބޮޑުހުރާ އައިލެންޑެވެ.
އެރަށްތައް ވިއްކާލުމުގައި ބީއެމްއެލްއިން ދެ ގޮތެއް ހުށަހަޅާފައިވެ އެވެ. ފުރަތަމަ ހުށަހެޅުމުގައިވާ ގޮތުން ތިން ރަށް އެއްކޮށް ގަތުމަށް ހުށަހަޅަންޖެހޭ އެންމެ ކުޑަ އަގަކީ 23.2 މިލިއަން ޑޮލަރު (355 މިލިއަން ރުފިޔާ) އެވެ. ދެވަނަ ހުށަހެޅުމުގައިވާ ގޮތުން ލ. ފަރެސް އާއި ކުޑަ ފަރެސް އަދި ބޮޑުހުރާ ވަކިން ގަނެވިދާނެ އެވެ. އެގޮތަށް ގަތުމަށްވެސް ހުށަހެޅޭނެ އެންމެ ކުޑަ އަގަކީ 23.2 މިލިއަން ޑޮލަރު ކަމަށް ބުނެފައިވެ އެެވެ.
މިކަމަށް ޝައުގުވެރިވާ ފަރާތްތަކުން އަންނަ މަހުގެ 28ގެ ކުރިން ޝައުގުވެރިކަން ފާޅުކުރުމަށް ބީއެމްއެލް އިން ވަނީ އެދިފަ އެވެ.
އެ ރަށްތައް ވިއްކާލަނީ ބީއެމްއެލް އިން ނެގި 11 މިލިއަން ޑޮލަރު (170 މިލިއަން ރުފިޔާ)ގެ ލޯނަކަށް ފައިސާ ނުދެއްކުމުންނެވެ. އެރަށްތަކުގެ ހެޑް ލީޒް ހަމަވާނީ 2064 ވަނަ އަހަރު އެވެ.