ފުޅާ ދާއިރާއެއްގައި ހަށި ވިއްކަމުން ދިޔަ އަށް ބިދޭސީއަކު އިމިގްރޭޝަންގެ ބެލުމުގެ ދަށަށް ގެންގޮސްފި އެވެ.
އިމިްގރޭޝަންގެ ބެލުމުގެ ދަށަށް ގެނައި މީހުންގެ ތެރޭގައި ފަސް މައްސަލައިގައި ހިމެނޭ ބިދޭސީ ހަތް އަންހެނަކު އަދި އެޖެންޓުންގެ ގޮތުގައި މަސައްކަތް ކުރަމުންދިޔަ ބިދޭސީ ދެ ފިރިހެނަކު ހިމެނެއެވެ.
މައްސަލަ ތަހުގީގު ކުރުމަށްފަހު އޭގެ ތެރެއިން ތިން ބިދޭސީއަކު ފިޔަވާ އެންމެން މިހާރު ވަނީ ރާއްޖެ އަނބުރާ ނާދެވޭ ގޮތަށް ޑީޕޯޓުކޮށްލާފަ އެވެ.
"އަނެއް ތިން ބިދޭސީން ޑީޕޯޓުކުރުމުގެ މަސައްކަތް މިހާރުދަނީ ކުރަމުން." އިމިގްރޭޝަނުން ބުންޏެވެ.
އިމިގްރޭޝަނުން ބުނީ އެމީހުން ހިފަހައްޓާފައިވަނީ ރާއްޖޭގައި ފުޅާދާއިރާއެއްގައި ހަށިވިއްކުމުގެ ވިޔަފާރިކުރަމުންދާ ބިދޭސީން ހޯދުމަށް އިމިގްރޭޝަނާއި ފުލުހުން ގުޅިގެން މި އޮކްޓޫބަރު މަހު ކުރިއަށް ގެންދިޔަ ހާއްސަ އޮޕަރޭޝަނުގެ ތެރެއިން ކަމަށެވެ.
މިފަހުން ވެސް އިމިގްރޭޝަނުން ވަނީ ފުޅާ ދާއިރާއެއްގައި ހަށި ވިއްކަމުން ދިޔަ ބިދޭސީންތަކެއް ޑީޕޯޓުކޮށްލާފަ އެވެ.
ރާއްޖޭގައި ގާނޫނާއި ގަވައިދާ ހިލާފަށް އުޅޭ ބިދޭސީން ހޯދުމަށް އިމިގްރޭޝަނުން ކުރިއަށް ގެންދާ ސިލްސިލާ މަސައްކަތްތަކުގެ ތެރެއިން ގިނަ އަދަދެއްގެ ބިދޭސީން ހޯދައި އެތައް ސަތޭކަ ބިދޭސީއަކު ވަނީ ރާއްޖެއިން ޑީޕޯޓްކޮށްފަ އެވެ.