މީހަކު ރަހީނުކުރުމުގެ ކުށުގައި އަނެއްކާވެސް ބަޔަކު ހައްޔަރުކޮށްފި އެވެ.
ފަސް މީހުންގެ ގުރޫޕަކުން ދިވެހި ފިރިހެނަކު ރަހީނުކޮށްފައިވަނީ ހުޅުމާލޭގެ އޯކިޑް ހިނގުމުގައި ކާރެއްގެ ތެރޭގައެވެ.
ފުލުހުން ބުނީ އެ މީހާ ރަހީނުކުރުމަށްފަހު އަނިޔާކޮށް، ބިރުދައްކައި އަދި އެމީހާގެ އާއިލާ މީހުންނަށް ގުޅައި ފައިސާ ދިނުމަށް އެދިފައިވާ ކަމަށެވެ.
މިމައްސަލައިގައި ފުރަތަމަ ހައްޔަރުކުރީ މާލޭ ދަފްތަރު ތޮލާލް މޫސާ (37 އ) އެވެ. އޭގެފަހުން އެތަނުން އިތުރު ހަތަރު މީހަކުވެސް ފުލުހުން ހައްޔަރުކޮށްފައިވެ އެވެ. އެގޮތުން ހައްޔަރުކުރި މީހުންނަކީ ހދ. ކުމުންދޫ، ރަތްބަގީޗާގެއަށް ނިސްބަތްވާ ދެ މީހުން ކަމަށްވާ ހުސާމް އިބްރާހީމް (34 އ) އާއި، އާދަމް ޝަރީފް (36 އ) އާއި، ގ. ކަޅަގާރިމާގެ، ހުސައިން ހައިކަލް ނިޔާޒު (23 އ)ގެ އިތުރުން ހުޅުމާލެ ފްލެޓް ނަންބަރު 04-1-71 އަހްމަދު ރިޝްފާން (26 އ) އެވެ.
މި މީހުންގެ ބަންދާ މެދު ގޮތެއް ނިންމުމަށް ހުޅުމާލެ މެޖިސްޓްރޭޓް ކޯޓަށް ހާޒިރުކުރުމުން ކޯޓުން ވަނީ މި މީހުންގެ ބަންދަށް ހަތް ދުވަސް ދީފަ އެވެ.
ފުލުހުން ދަނީ މިމައްސަލަ އިތުރަށް ތަހުގީގު ކުރަމުންނެވެ.