ގޭންގަކުން ރަހީނުކޮށްފައި ހުރި މީހަކު ސަލާމަތްކޮށްފި އެވެ.
ފުލުހުން ބުނީ މީހަކު ރަހީނުކޮށްފައި ހުރި ކަމުގެ މައުލޫމާތު ލިބުނީ މިރޭ 7:00 ހާއިރު ކަމަށެވެ.
މައުލޫމާތު ލިބުމާ އެކު ފުރަތަމަ މަސައްކަތް ކުރީ މި މީހާ ހުރި ތަނެއް ދެނެގަތުމަށް ކަމަށް ފުލުހުން ބުންޏެވެ.
ފުލުހުންގެ މަސައްކަތުން މި މީހާ ހުރީ ހުޅުމާލޭގެ ހިޔާ ޓަވަރުތަކުގެ ތެރެއިން ނުވަވަނަ ޓަވަރުގެ 20 ވަނަ ފަންގިފިލާގައި ކަން ހޯދާފައިވެ އެވެ.
ރަހީނުކޮށްފައި ހުރި މީހާ ހުރި އެޕާޓްމަންޓަށް ފުލުހުން ވަނީ ކޯޓު އަމުރެއް ހޯދައިގެން އެޕާޓްމަންޓްގެ ދޮރު ވައްޓާލައިގެންނެވެ.
ފުލުހުން ބުނީ އެޕާޓްމަންޓުގައި މީހަކު ރަހީނުކޮށްގެން ގެންގުޅުމުގެ ތުހުމަތުގައި 12 މީހަކު އެ ތަނުން ހައްޔަރުކޮށްފައިވާ ކަމަށެވެ. އަނިޔާ ލިބުނު މީހާގެ ބޯ ބާލާފައިވާ ކަމަށާއި އަދި ފުލުހުން އެތަނަށް ވަންއިރު އަނިޔާ ލިބުނު މީހާގެ އިނގިލި ބުރިކޮށްލުމަށް ގޭންގު މީހުން ތައްޔާރުވަމުން ދިޔަ ކަމަށްވެސް ފުލުހުން ބުންޏެވެ.
ރަހީނުކޮށްފައި ހުރި މީހާގެ ބޯ ބޭލުން ފިޔަވާ ޖިސްމާނީ އިތުރު އަނިޔާއެއް ދީފައި ހުރިކަން ފާހަގަނުކުރެވޭ ކަމަށްވެސް ފުލުހުން މައުލޫމާތު ދީފައިވެ އެވެ.
ފުލުހުން ބުނީ މީހަކު ރަހީނުކުރުމުގެ މިމައްސަލައިގައި އިތުރު ބައެއްގެ ބައިވެރިވުން އޮތްތޯ ބަލަމުންދާ ކަމަށެވެ.
ހުޅުމާލޭގެ ދެވަނަ ފިޔަވަހީގައި ހަދާފައިވާ ހިޔާ ޓަވަރުތަކުގައި މީހުން ރަހީނުކުރުމުގެ ހާދިސާތައް މީގެކުރިންވެސް ހިންގާފައިވެ އެވެ. އެހެންވެ ނުދަންނަ މީހަކު ބުނި ނަމަވެސް ނުދަންނަ ތަނަކަށް ނުދިއުމަށް ފުލުހުން ގެންދަނީ ތަކުރާރުކޮށް އިލްތިމާސް ކުރަމުންނެވެ.