އިޒުރޭލު ފައިޓަރު ޖެޓުތަކުން ހޮނިހިރު ދުވަހު އީރާނަށް ހަމަލާދިނުމުގެ ކުރިން -- ހަމާލާދޭން އުޅޭކަން އިޒުރޭލު ސަރުކާރުން އީރާނަށް އެންގި ކަމަށް ބުނެ މީޑިއާތަކުން ހަދަނީ ދޮގު ކަމަށް ބޮޑުވަޒީރު ބެންޖަމިން ނަތަންޔާހޫގެ އޮފީހުން ބުނެފި އެވެ.
އިޒުރޭލުގެ ވައްލާ ނިއުސްއިން ބުނި ގޮތުން، ތިން ވަނަ ފަރާތެއްގެ އެހީގައި އީރާނާ މުއާމަލާތްކުރަން އިޒުރޭލު ސަރުކާރުން ރޭވި އެވެ. ބޭނުމަކީ އީރާނަށް ހަމަލާދިނުމުގެ ކުރިން -- ހަމަލާދޭ ތަންތަނާއި، ވަގުތު އަދި ހަމަލާތަކުގެ ކުޑަބޮޑުމިން އޮޅުންފިލުވައި ދިނުމެވެ.
އިޒުރޭލުގެ ނޫސްތަކުގައި ޝާއިއުކުރި މި ޚަބަރާ ގުޅިގެން ދުނިޔޭގެ މަޝްހޫރު ބައެއް ނޫސްތަކުން ވެސް ވަނީ މި ވާހަކަތައް ބޮޑުކޮށްގެން ދައްކާފަ އެވެ.
ނަމަވެސް، އިޒުރޭލުގެ ބޮޑުވަޒީރު ބެންޖަމިން ނަތަންޔާހޫގެ އޮފީހުން ނެރުނު ބަޔާނެއްގައި ވަނީ މި ވާހަކަތައް ދޮގުކޮށްފަ އެވެ.
އީރާނަށް ހަމަލާދިނުމުގެ ކުރިން، ހަމަލާތަކާ ބެހޭ އެއްވެސް ވާހަކައެއް އީރާނަށް ފޯރާފައި ނުވާނެ ކަމަށް ބަޔާނުގައި އޮތެވެ. އެކަން އެ ގޮތަށް ވުމަކީ މުސްތަހީލު ކަމެއް ކަމަށް ވެސް ބަޔާނުގައި އޮތެވެ.
ރިޕޯޓްތައް ބުނާ ގޮތުން އިޒުރޭލުން އީރާނަށް ހަމަލާދިނުމުގެ ކުރިން، އިޒުރޭލުގެ ހަމަލާތައް ރާވާފައި ހުރި ގޮތް ވަނީ އީރާނަށް އޮޅުންފިލާފަ އެވެ. އެއީ އެމެރިކާއާ އިޒުރޭލު ގުޅިގެން ރޭވި ރޭވުންތައް ކޮންމެވެސް ގޮތަކުން ލީކުވުމުގެ ސަބަބުންނެވެ.
ބަޔާނުގައި އިތުރަށް ބުނެފައިވާ ގޮތުން އިޒުރޭލުގެ ރޭވުންތައް ބަޔަކު ބުނާހާ ދޯހަޅިއެއް ނުވާނެ އެވެ. އަސްކަރީ ފެންވަރުގައި ރާވާފައި ހުރި ރޭވުންތަކެއް ދައުލަތުގެ ވެރިން ނޫން ބަޔަކަށް ނުފެންނާނެ ކަމަށް ވެސް ވަނީ ބުނެފަ އެވެ.