ޕްރިމިއާ ލީގުގައި ރޭ ވެސްޓްހޭމް ޔުނައިޓެޑްއާ ދެކޮޅަށް ކުޅުނު މެޗުން މެންޗެސްޓާ ޔުނައިޓެޑް 2-1 ގެ ނަތީޖާއަކުން ބަލިވެއްޖެ އެވެ.
ވެސްޓްހޭމްގެ ދަނޑުގައި ކުޅުނު މި މެޗުން ބަލިވުމާއެކު ލީގުގައި ނުވަ މެޗުން 11 ޕޮއިންޓް ހޯދާފައިވާ މެންޗެސްޓާ ޔުނައިޓެޑް މިހާރު އޮތީ 14 ވަނައިގަ އެވެ. ވެސްޓްހޭމް އޮތީ 13 ވަނައިގައެވެ.
މި މެޗުގެ ފުރަތަމަ ހާފުގައި މެންޗެސްޓާ ޔުނައިޓެޑުން ވަނީ މެޗު ކޮންޓްރޯލްކޮށް، ލަނޑު ޖަހާނެ ރަނގަޅު ފުރުސަތުތަކެއް ހޯދާފައެވެ. ނަމަވެސް ދެވަނަ ހާފް ފެށުމާއެކު ވެސްޓްހޭމްގެ ކުޅުން ރަނގަޅުވެ، ޔުނައިޓެޑްގެ ގޯލަށް ނުރައްކާތެރި ހަމަލާތަކެއް ދީފައިވެ އެވެ.
މެޗުގެ 74 ވަނަ މިނެޓުގައި ވެސްޓްހޭމްގެ ސަމާވިލް ވަނީ އެ ޓީމަށް ކުރިއެރުން ހޯދައިދީފަ އެވެ. މެޗުގެ ފުރިހަމަ ވަގުތު ހަމަވާން ނުވަ މިނެޓަށް ވެފައިވަނިކޮށް ޔުނައިޓެޑްގެ ކަސެމީރޯ ވަނީ ހަމަހަމަކުރުމުގެ ލަނޑު ޖަހާފައެވެ.
މެޗުގެ އިތުރު ވަގުތުގައި ވެސްޓްހޭމަށް ލިބުނު ޕެނަލްޓީއަކުން ބޮވެން ޖެހި ލަނޑާއެކު އެ ޓީމަށް މެޗުގެ ތިން ޕޮއިންޓް ކަށަވަރުވިއެވެ. ޕެނަލްޓީ ދިނުމާ ގުޅިގެން ޔުނައިޓެޑްގެ ކުޅުންތެރިންނާއި އޮފިޝަލުން ވަނީ ރެފްރީގެ ނިންމުމާމެދު ހިތްހަމަނުޖެހުން ފާޅުކޮށްފަ އެވެ. މި ޕެނަލްޓީ ދިން ސަބަބު ޕްރިމިއާ ލީގުގެ މެޗު ސެންޓަރުން މެޗަށްފަހު ވަނީ އެކްސްގައި ހާމަކޮށްފަ އެވެ.