ޑެޕިއުޓީ ޕްރޮސެކިއުޓާ ޖެނެރަލްގެ މަގާމުގައި ހުރި ހައިކޯޓުގެ ކުރީގެ ފަނޑިޔާރު އަލީ ސަމީރު މަގާމުން އިސްތިއުފާ ދެއްވައިފި އެވެ.
ސަމީރު ސޯޝަލް މީޑިއާގައި ކުރެއްވި ޕޯސްޓެއްގައި ވަނީ އިއްޔެ އަކީ ޕީޖީ އޮފީހުގައި އޭނާ މަސައްކަތްކުރި އެންމެ ފަހު ދުވަސް ކަމުން އެކުގައި މަސައްކަތްކުރި މުވައްޒަފުންނަށް ޝުކުރު އަދާކުރައްވާފަ އެވެ. އަދި ކުރިއަށް އޮތް ތަނުގައި އުއްމީދީ މަސައްކަތްތަކެއްވާ ކަމަށް ވެސް ވިދާޅުވި އެވެ.
އޭނާ އިސްތިއުފާ ދެއްވި ވަކި ސަބަބެއް އެނގިފައެއް ނުވެއެވެ.
ސަމީރު ޑެޕިއުޓީ ޕީޖީގެ މަގާމަށް އައްޔަންކުރެއްވީ 12 މެއި 2022 ގައެވެ. އަލީ ސަމީރުގެ އިތުރުން ޑެޕިއުޓީ ޕްރޮސެކިއުޓާ ޖެނަރަލްގެ މަގާމުގައި ދެން ހުންނެވީ މަހްމޫދު ސަލީމް އެވެ.
ހައި ކޯޓުގެ ފަނޑިޔާރު ކަމުން އަލީ ސަމީރު އިސްތިއުފާ ދެއްވީ މިދިޔަ މަހުގެ 17 ވަނަ ދުވަހު އެވެ. އިސްތިއުފާ ދެއްވި ވަކި ސަބަބެއް ހާމަކޮށްފައި ނުވި ނަމަވެސް އޭނާ އިސްތިއުފާ ދެއްވީ ޖޭއެސްސީން އަލީ ސަމީރުގެ މައްސަލައެއް ބަލަމުން ދަނިކޮށެވެ.
ހައިކޯޓުގެ ފަނޑިޔާރުކަމުގެ މަގާމަށް ސަމީރު އަދާކުރެއްވީ މާޗް 26، 2011 އިން އޭޕްރީލް 17، 2022 އަށެވެ.
ސަމީރަކީ މިސްރުގެ އަލްއަޒުހަރު ޔުނިވަސިޓީން ޝަރީއަތާއި ގާނޫނުގެ ރޮނގުން މަތީ ތައުލީމު ހާސިލް ކުރެއްވުމަށްފަހު، މެލޭޝިއާގެ އިންޓަނޭޝަނަލް އިސްލާމިކް ޔުނިވަސިޓީން ކޮމްޕަރޭޓިވް ލޯ އިން މާސްޓާސް ޑިގްރީ ހާސިލް ކުރައްވާފައިވާ ބޭފުޅެކެވެ.
ސަމީރު އަދާކުރައްވާފައިވާ މަގާމުތަކުގެ ތެރޭގައި ޖިނާއީ ކޯޓުގެ ސެކްރެޓެރީކަމާއި، މަދަނީ ކޯޓުގެ ސީނިއާ އެޑްމިން އޮފިސަރުކަމާއި، މަދަނީ ކޯޓުގެ ގާޒީ ކަމާއި، މަދަނީކޯޓުގެ އިސް ގާޒީ ކަމާއި، ސިވިލްކޯޓުގެ އިސް ގާޒީ ކަން ވެސް ހިމެނެ އެވެ.
ސަމީރަކީ ހައިކޯޓުގެ ފަނޑިޔާރުންގެ ތެރެއިން ޖޭއެސްސީގެ މެންބަރު ކަންވެސް ކުރައްވާފައިވާ ބޭފުޅެކެވެ.