އެންޓި ކޮރަޕްޝަން ކޮމިޝަން (އޭސީސީ)ގެ ރައީސް އާއި ނައިބުރައީސް އައްޔަންކުރުމުގެ ބާރު ރައީސުލްޖުމްހޫރިއްޔާއަށް ލިބޭ ގޮތަށް ސަރުކާރުގެ ފަރާތުން ހުށަހެޅި އިސްލާހަކީ ޑިމޮކްރަސީގައި ފަހަތަށް އެޅޭ ފިޔަވަޅެއް ކަމަށް ގަލޮޅު ދެކުނު ދާއިރާގެ މެންބަރު މީކާއީލް އަހުމަދު ނަސީމް ވިދާޅުވެއްޖެ އެވެ.
އޭސީސީގެ ރައީސް އާއި ނައިބުރައީސް އައްޔަންކުރުމުގެ ބާރު ރައީސުލްޖުމްހޫރިއްޔާއަށް ލިބޭ ގޮތަށް އެންޓި-ކޮރަޕްޝަން ކޮމިޝަނުގެ ގާނޫނަށް އިސްލާހު ހުށަހެޅުއްވީ ސަރުކާރުގެ ފަރާތުން ފެލިދޫ ދާއިރާގެ މެންބަރު އާދަމް ޒާހިރު އެވެ.
ރައްޔިތުންގެ މަޖިލީހުގައި މިއަދު ކުރިއަށްދިޔަ ބިލްގެ ބަހުސްގައި މީކާއީލް ވިދާޅުވީ ތިން ބާރު ވަކިވެފައިވާ ޑިމޮކްރެޓިކް ނިޒާމެއް ރާއްޖެއިން ހޯދީ އެތައް ބަޔަކު ކުރި ބުރަ މަސައްކަތުން ކަމަށެވެ. ތިން ބާރު ވަކިވެފައިވާ ޑިމޮކްރެޓިކް ނިޒާމު ހަލާކުކޮށްލަން ފަހަތަށް އަޅާ ފިޔަވަޅަކަށް އިސްލާހެއް ނުކިޔޭނެ ކަމަށްވެސް އޭނާ ވިދާޅުވި އެވެ.
އޭސީސީގެ ރައީސް އައްޔަންކުރުމުގެ ބާރު ރައީސުލްޖުމްހޫރިއްޔާއަށް ދޭތީ މީކާއީލް ވަނީ އެކަމަށް ފާޑު ވިދާޅުވެފަ އެވެ.
"އަޅުގަނޑު ހަމަ ހިތައް އަރަނީ ރައީސުލްޖުމްހޫރިއްޔާ އައްޔަންކުރެއްވެވީތީ މީހަކަށް ލިބޭ އިތުރު ހިކުމަތެއް، އަޅުގަނޑުމެންނަށް ނޭނގޭ ހިކުމަތެއް އޮތީބާއޭ،" މީކާއީލް ވިދާޅުވި އެވެ.
މި އިސްލާހަކީ އޭސީސީ އާއި މިނިވަން މުއައްސަސާތަކަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ފޮނުއްވާ ސިގުނަލެއް ކަމަށް މީކާއީލް ސިފަކުރެއްވި އެވެ.
"ތިމަންނާ ބޭނުން ގޮތަށް ތި ތަންތަނުން ތި މުއައްސަސާތަކުން އަމަލު ނުކުރާ ކަމަށްވަންޏާ ކަނޑާލާނަމޭ،" މީކާއީލް ވިދާޅުވި އެވެ.
މީކާއީލް ވަނީ ޑިމޮކްރަސީގައި ފަހަތަށް އެޅޭ ފިޔަވަޅެއްގައި އެއްބާރުލުން ނުދިނުމަށް އެހެން މެންބަރުންނަށް ގޮވާލައްވާފަ އެވެ.