ލޮނު ފެނުން މަސް ފިނިކުރާ ނިޒާމު ގާއިމުކުރުމަށް ދޫކުރަން ނިންމާފައިވާ ލޯނުގެ ދަށުން އެ ނިޒާމަށް އެދޭ ދޯނިތަކުގެ އިވެލުއޭޝަން ފުރިހަމަ ކުރުމަށްފަހު އަންނަ ނޮވެމްބަރު މަހު ފައިސާ ދޫކުރުމުގެ މަސައްކަތް ކުރަމުންދާ ކަމަށް ފިޝަރީޒު މިނިސްޓަރު އަހްމަދު ޝިޔާމު ވިދާޅުވެއްޖެ އެވެ.
ފަރުމަހުގެ މަސްވެރިކަން ތަަރައްގީ ކުރުމަށް ލޯނު ދޫކުރުމަށް މިއަދު ބޭއްވި ރަސްމިއްޔާތުގައި ވާހަކަ ދައްކަވަމުން ޝިޔާމު ވިދާޅުވީ އާރްއެސްޑަބްލިއު ފެސިލިޓީއަކީ ސަރުކާރަކުން މިހާތަނަށް މިސިނާއަތުގައި އޮޑިވެރިންނަށް ހުޅުވާލާފައިވާ އެންމެ ފަހި ފުރުސަތު ކަމަށެވެ.
"މިކަމުގެ ސަބަބުން ބާނާ މަސް ތާޒާ ކަންމަތީ ބެހެއްޓޭނެ ކަމަށް ފެނޭ،" ޝިޔާމު ވިދާޅުވި އެވެ.
މިނިސްޓަރު ވިދާޅުވީ މި ފެސިލިޓީގެ ސަބަބުން އޮޑިވެރިންނަށް ލިބޭނެ ފައިދާތަކުގެ ތެރޭގައި 35 ޕަސެންޓްގެ ޑިސްކައުންޓެއް ލިބުމާއި ރަހުނަކާ ނުލައި ދެ މިލިއަން ރުފިޔާއާ ހަމައަށް ފެސިލިޓީ ލިބޭނެ ގޮތް ހަމަޖެހުން ހިމެނޭ ކަމަށެވެ.
މީގެ އިތުރުން ފައިސާ ދެއްކުމަށް ހަމަސް ދުވަހުގެ ގްރޭސް ޕީރިއަޑެއް ލިބިގެން ދާނެ ކަމަށާއި ބަހާލައިގެެން ފައިސާ ދައްކާއިރު ދިހަ އަހަރު ދުވަހުގެ މުއްދަތެއް ފައިސާ ދައްކަންވެސް ލިބޭނެ ކަމަށް ޝިޔާމު ވިދާޅުވި އެވެ.
މި ލޯނަށް އެދުމުގެ ފުރުސަތު ހުޅުވާލާފައިވަނީ އަންނަ މަހުގެ ނިޔަލަށެވެ.