މަސްވެރިކަމުގެ ސިނާއަތައް ދިމާވެފައިވާ ދަތިކަން ހައްލުކުރުމަށް މަސްފިނި ކުރުމުގެ ނިޒާމު 25،000 ހާސް ޓަނަށް އިތުރު ކުރުމަށް ނިންމާފައިވާ ކަމަށް ފިޝަރީޒް މިނިސްޓަރު އަހްމަދު ޝިޔާމު ވިދާޅުވެއްޖެ އެވެ.
ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޝިޔާމު ވިދާޅުވީ މަސްވެރިކަމަށް މިހާރު ދިމާވެފައިވާ އެންމެ ބޮޑު ދަތިކަމަކީ ސްޓޯރޭޖު ކެޕޭސިޓީ އެކަށީގެންވާ ވަރަށް ނެތުމުން ބޭނުންވާ އަގުގައި މަސް ބޭރުކުރުމަށް ގިނަ ދަތިތަކާއި ކުރިމަތިލާން ޖެހުން ކަމަށެވެ.
އެކަން ހައްލުކުރުމަށް ގިނަ މަސައްކަތްތަކެއް ކުރަމުންދާ ކަމަށާއި އެގޮތުން 8،500 ޓަނުގެ ގޮތުގައި މިހާރު ހުރި ކެޕޭސިޓީ ކުރިއަށް އޮތް ފަސް އަހަރު ނިމޭއިރު 25،000 ޓަނަށް އިތުރު ކުރުމަކީ އަމާޒެއް ކަމަށް ޝިޔާމު ވިދާޅުވި އެވެ.
މިނިސްޓަރު ވިދާޅުވީ ބޭނުންވާ ވަރަށް ސްޓޯރޭޖް ކެޕޭސިޓީ ނެތުމުން ބޭނުންވާ އަގުތަކުގައި ބޭނުންވާ ގޮތަށް މަސް ބޭރުކުރުމުގެ ފުރުސަތު މިވަގުތު ނުލިބޭ ކަމަށެވެ. އެހެންވެ މަހުގެ ހަމަ އަގު މަސްވެރިންނަށް މިވަގުތު ހޯދައިދިނުމަށް ބޮޑެތި ދަތިތައް އެބަހުރި ކަމަށްވެސް ވިދާޅުވި އެވެ.
"ކެޕޭސިޓީ ނެތުމުން މިޖެހެނީ ބޭނޭ ވަރަކަށް މަސް ރޯމެޓީރިއަލް ގޮތުގައި ބޭރުކުރަން. އެހެންވެ މި ޖެހެނީ އަޅުގަނޑުމެން ބޭނުން ނެތަސް ބޭރުކުރަން އެ މީހުން ބުނި އަގެއްގައި،" ޝިޔާމު ވިދާޅުވި އެވެ.
މިނިސްޓަރު އިތުރަށް ވިދާޅުވީ ރާއްޖޭގެ އެކި ސަރަހައްދުތަކުގައި މަސްފިނި ކުރުމުގެ ނިޒާމު އިތުރު ކުރެވިގެންދާނެ ކަމަށެވެ. އޭރުން މިފްކޯއަށް މަސް ގަންނަ އަގު އިތުރުކުރެވޭނެ ކަމަށްވެސް ވިދާޅުވި އެވެ.