ރީތީގެ އެންމެ ބޮޑު އެއް މުބާރާތް "މިސް ޔުނިވާސް"ގައި ދިވެއްސަކު ބައިވެރިވުމުން އެކަން ސަރުކާރުން ކުށްވެރިކޮށްފި އެވެ.
ޔޫތް މިނިސްޓްރީން މިއަދު ނެރުނު ނޫސް ބަޔާނެއްގައި ބުނީ ދިވެހިންގެ ދީނާއި އަގީދާއާއި ސަގާފަތާއި ނުގުޅޭ ހަރަކާތްތަކާއި މުބަރާތްތައް ބޭއްވުމާއި އެފަދަ މުބާރާތްތަކުގައި ދިވެހިން ބައިވެރިވުމަކީ ދިވެހި ސަރުކަރުން ބަލައިގަންނަ ކަމެއް ނޫން ކަމަށެވެ.
މިނިސްޓްރީން ބުނީ އެފަދަ ހަރަކާތަކަށް ނުވަތަ މުބާރާތަކަށް ދިވެއްސަކު ދިޔުން ދިވެހި ސަރުކާރުން ކުށްވެރިކުރާ ކަމަށެވެ.
"އެ ހަރަކާތުގައި ބައިވެރިވުމަށް މަސައްކަތް ކުރަމުންދާ ފަރާތުން އެކަން ހުއްޓާލުމަށް ވެސް ގޮވާލަން،" މިނިސްޓްރީން ބުންޏެވެ.
ޔޫތް މިނިސްޓްރީން އިތުރަށް ބުނީ ރާއްޖެ ތަމްސީލުކުރުމުގެ ނަމުގައި އެފަދަ އެއްވެސް ހަރަކާތެއްގައި ދިވެއްސަކު ބައިވެރިވުމަކީ ދިވެހި ސަރުކާރުން ކުރާނެ ކަމެއް ނޫން ކަމަށެވެ. މިފަދަ ކަންކަމަކީ ސަރުކާރުން ކުރުވާ ކަމެއް ކަމަށް ދޭހަވާ ގޮތަށް މައުލޫމާތު ނުފެތުރުވުމަށްވެސް މިނިސްޓްރީން ވަނީ ގޮވާލާފަ އެވެ.
މިސް ޔުނިވާސްގައި ދިވެއްސަކު ބައިވެރިވުން ސަރުކާރުން ކުށްވެރިކޮށްފައި މިވަނީ މިސް ޔުނިވާސްގައި ރާއްޖޭގެ ފަރާތުން އުމުރުން 21 އަހަރުގެ މަރިޔަމް ޝައިނާ ނަސީމް ކިޔާ ޒުވާނެއް ފުރަތަމަ ފަހަރަށް ވާދަކުރުމަށް ހަމަޖެހިފައި ވަނިކޮށެވެ.
ޝައިނާ މީގެކުރިން ވަނީ ރާއްޖޭގައި ބޭއްވި ޓޮޕް މޮޑެލް މޯލްޑިވްސް 2022ގައި ބައިވެރިވެ އެ މުބާރާތް ކާމިޔާބުކޮށްފަ އެވެ. މީގެއިތުރުން މިދިޔަ އަހަރު މިސްރުގައި ބޭއްވި ޓޮޕް މޮޑެލް އޮފް ދަ ވޯލްޑް މުބާރާތުގައިވެސް އޭނާ ބައިވެރިވި އެވެ.
މިސް ޔުނިވާސްގެ 73 ވަނަ އެޑިޝަންގެ ފައިނަލް މިއަހަރު އޮންނާނީ މެކްސިކޯގެ ވެރިރަށް މެކްސިކޯ ސިޓީގައި ކުރިއަށް އޮތް ނޮވެމްބަރު 16 ވަނަ ދުވަހު އެވެ.