ރާއްޖޭގައި އެންމެ ޒަމާނީ ވަަސީލަތްތަކާ އެކު ސިނަމާއެއް އަޅަން ނިންމަފައިވާ ކަމަށް ޔޫތު މިނިސްޓަރު އިބްރާހިމް ވަހީދު (އަސްވާޑް) ވިދާޅުވެއްޖެ އެވެ.
އަސްވާޑް ވިދާޅުވީ ޒަމާނީ ސިނަމާއެއް ތަރައްގީކޮށް މި ސަރުކާރުގެ ފަސް އަހަރުގެ ތެރޭގައި އެކަން ހަގީގަތަކަށް ހައްދަވައި ދެއްވާނެ ކަމަށެެވެ.
ރާއްޖޭގައި މިހާރު ރަސްމީކޮށް ފިލްމު އަޅުވާ ތަނެއްގެ ގޮތުގައި ބޭނުންކުރަމުންދަނީ އޮލިމްޕަސް އެކަނި ކަމަށްވާތީ ރާއްޖެގެ ފިލްމު އިންޑަސްޓްރީއަށް ދަތިތަކެއް ކުރިމަތި ވެފައިވާ ކަމަށްވެސް މިނިސްޓަރު ވިދާޅުވި އެވެ.
އަސްވާޑް ވިދާޅުވީ އޮލިމްޕަހަކީ ފިލްމު އެޅުވުމުގެ އިތުރުން ތަފާތު އެތައް ހަރަކާތްތަކެއް ކުރިއަށް ގެންދާ ތަނަކަށް ވާތީ މިހާރު ކުރިއަރަމުން އަންނަ ފިލްމު އިންޑަސްޓްރީއަށް ދިމާވެފައިވާ ދަތިތައް ހައްލުކުރުމަށް އިތުރު ސިނަމާއެއް ރާއްޖޭގައި ހުންނަން ޖެހޭ ކަމަށެވެ.
"މިހާރު އޮލިމްޕަސް ހޯދަން ޕްރޮޑިއުސަރުން ކިއުގައި ތިބެން ޖެހެނީ. އެހެންވެ އެ މައްސަލައަށް ހައްލެއް ހޯދައިދޭން މި ސަރުކާރުން ބޭނުންވޭ،" އަސްވާޑު ވިދާޅުވި އެވެ.
އޮލިމްޕަސް ފިޔަވާ ރާއްޖޭގެ އެއްވެސް ރަށެއްގައި ރަސްމީ ސިފައެއްގައި ފިލްމު އަޅުވާނެ ސިނަމާއެއް މިވަގުތު ނެތްކަންވެސް މިނިސްޓަރުގެ ވަނީ ފާހަގަކުރައްވާފަ އެވެ.