ގުދުރަތީ މާހައުލު ރައްކާތެރިކުރުމަށް އޭޝިއާގެ ގައުމުތަކާއެކު އަންނަ އަހަރު ރާއްޖޭގައި މަޝްވަރާ ބައްދަލުވުންތަކެއް ބާއްވާނެ ކަމަށް އެންވަޔަރަންމަންޓް މިނިސްޓަރު ތާރިގް އިބްރާހިމް ވިދާޅުވެއްޖެ އެވެ.
ކޮންވެންޝަން އޮން ބަޔޮލޮޖިކަލް ޑައިވާސިޓީ (ސީބީޑީ)ގެ 16 ވަނަ ބައްދަލުވުމުގައި ބޭއްވި އޭޝިއާ ޕްރޮޓެކްޓެޑް އޭރިއާސް ޕާޓްނާޝިޕް ނިންމުމުގެ ރަސްމިއްޔާތުގައި ވާހަކަދައްކަވަމުން މިނިސްޓަރު ތޯރިގު ވިދާޅުވީ އެ އިވެންޓުގެ ކޯ-ޗެއާގެ ހައިސިއްޔަތުން ރާއްޖޭގައި އަންނަ އަހަރު ޓެކްނިކަލް ކޮމިޓީގެ ބައްދަލުވުމެއް ބާއްވާނެ ކަމަށެވެ.
މިނިސްޓަރު ވިދާޅުވީ އެ ބައްދަލުވުމުގައި ހިމާޔާތްކޮށްފައިވާ ސަރަހައްދުތަކާ ބެހޭ ގޮތުން މަޝްވަރާކުރުމާއި ތަޖުރިބާ ހިއްސާކުރުން ކުރިއަށްދާނެ ކަމަށެވެ.
އެ ބައްދަލުވުމުގެ ސަބަބުން ގުދުރަތީ މާހައުލު ރައްކާތެރި ކުރެވޭ މަސައްކަތުގައި ރާއްޖޭގެ ދައުރު ބޮޑުވެގެންދާނެ ކަމަށްވެސް ވިދާޅުވި އެވެ.
މިނިސްޓަރު، ކޮލަމްބިއާއަށް ކުރައްވަމުން ގެންދަވާ ރަސްމީ ދަތުރުގައި ކޮންވެންޝަން އޮން ބަޔޮލޮޖިކަލް ޑައިވާސިޓީގެ 16 ވަނަ ކޮންފަރަންސް އޮފް ދަ ޕާޓީސްގައި ބައިވެރިވެވަޑައިގަތެވެ.
މި ކޮންފަރެންސަކީ މިމަހު 21 ވަނަ ދުވަހުން ފެށިގެން އަންނަ މަހުގެ އެއްވަނަ ދުވަހާ ހަމައަށް ކުރިއަށް ދާ ކޮންފަރެންސެކެވެ. މިނިސްޓަރު ކޮލަމްބިއާއަށް ފުރާވަޑާއިގަތީ މިމަހުގެ 25 ވަނަ ދުވަހު އެވެ.