ވެބްސައިޓްތަކާއި އެޕްތައް ބޭނުންކޮށްގެން އޮންލައިންކޮށް ޖުވާކުޅުން ހުއްޓުވުމަށްޓަކައި ގާނޫނުތައް އިސްލާހު ކުރާނެ ކަމަށް ބަންޑާރަނައިބް އަހްމަދު އުޝާމު ވިދާޅުވެއްޖެ އެވެ.
ނޫސްވެރިންނާ މިއަދު ބައްދަލުކުރައްވާ އުޝާމު ވިދާޅުވީ ޖުވާކުޅުން ވަރަށް ބޮޑަށް އާންމުވެފައިވާތީ އެ މައްސަލަ ހައްލުކުރެވޭނީ ކަމާ ގުޅޭ ގާނޫނުތައް އިސްލާހުކޮށްގެން ކަމަށެވެ.
"އެކަން [ޖުވާކުޅުން] ހުއްޓުވުމަށް ގާނޫނަށް ގެންނަންޖެހޭ އިސްލާހުތައް އަޅުގަނޑުމެން ގެންނާނަން،" ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި އުޝާމް ވިދާޅުވި އެވެ.
ޖުވާކުޅުން ހުއްޓުވުމަށްޓަކައި ރައީސް ޑރ. މުހައްމަދު މުއިއްޒުގެ ސަރުކާރުން ވަނީ މިދިޔަ ޖުލައި މަހުން ފެށިގެން އެކަމަށް ބޭނުންކުރާ ވެބްސައިޓްތައް ބްލޮކްކުރަންވެސް ފަށާފަ އެވެ.
ކޮމިއުނިކޭޝަން އޮތޯރިޓީ އޮފް މޯލްޑިވްސް (ކޭމް) އިން ވަނީ ޖުވާކުޅެން ބޭނުންކުރާ ވެބްސައިޓްތަކެއް ބްލޮކްކޮށްފައިވާ ކަމަށްވެސް މީގެކުރިން ބުނެފަ އެވެ. ނަމަވެސް އެކަމާ ގުޅޭ އިތުރު މައުލޫމާތު ހިއްސާކޮށްފައެއް ނުވެ އެވެ.
ރާއްޖޭގައި އޮންލައިންކޮށް ޖުވާކުޅުން ވަރަށް ބޮޑަށް އާންމުވެ ސޯޝަލްމީޑިއާގެ އެކި ވަސީލަތްތަކުގައި އެކަން ޕްރޮމޯޓްކުރުންވެސް ވަނީ ވަރަށް ބޮޑަށް އާންމުވެފަ އެވެ.