މޯލްޑިވްސް މީޑިއާ ކައުންސިލް (އެމްއެމްސީ) އިން ދޭ ނޫސްވެެރިކަމުގެ އެވޯޑްގައި ހިމެނޭ ލައިފްޓައިމް އެޗީވްމަންޓް އެވޯޑް މިއަހަރު ދެ ބޭފުޅަކަށް ދީފި އެވެ.
އެގޮތުން މިއަހަރު މި އެވޯޑް ލިބުނު ބޭފުޅުންނަކީ "އާފަތިސް" ނޫހުގެ ކުރީގެ އެޑިޓަރު އަހްމަދު ޒާހިރު (ފެއަރީ ޒާހިރު) އާއި "ދައުރު" ނޫހުގެ އެޑިޓަރު މޫސާ ލަތީފް އެވެ.
އެމްއެމްސީ އިން ދޭ ލައިފްޓައިމް އެޗީވްމަންޓް އެވޯޑަކީ ނޫސްވެރިކަމުގެ ދާއިރާގައި ގިނަ އަހަރުތަކަކު މަސައްކަތް ކުރައްވާފައިވާ ބޭފުޅުންގެ ހިދުމަތުގެ އަގުވަޒަންކުރުމުގެ ގޮތުން ދޭ އެވޯޑެކެވެ.
މޫސާ ލަތީފަކީ ނޫސްވެރިކަމުގެ ދާއިރާ އިން ސަރުކާރުން ދޭ ހިތްވަރު ދިނުމުގެ ގައުމީ އިނާމާއި ޝަރަފުވެރިކަމުގެ ގައުމީ އިނާމުގެ އިތުރުން ނޫސްވެރިކަމުގެ ރަން ގަލަމާއި އަލިމަސް ގަލަންވެސް ހާސިލުކުރައްވައިފަ އެވެ.
ފެއަރީ ޒާހިރަކީވެސް ނޫސްވެރިކަމުގެ ދާއިރާ އިން ސަރުކާރުން ދޭ ހިތްވަރު ދިނުމުގެ ގައުމީ އިނާމާއި އެމްއެމްސީ އިން ދޭ ނޫސްވެރިކަމުގެ ރަން ގަލަން ހާސިލްކުރައްވާފައިވާ ބޭފުޅެކެވެ.
ނޫސްވެރިކަމުގެ ރޮނގުން މެލޭޝިއާ އިން ފުރަތަމަ ޑިގްރީ ހާސިލުކުރައްވާފައިވާ މޫސާ ލަތީފް ވަނީ ހަވީރު، މިހާރުގައި ނޫސްވެރިއެއްގެ އިތުރުން އެޑިޓަރުކަންވެސް ކުރައްވާފަ އެވެ. މޫސަ އަކީ މިވަގުތު "ދައުރު"ގެ އެޑިޓަރެވެ.
ފެއަރީ ޒާހިރަކީ ސަރުކާރުގެ ޒިންމާދާރު ވަޒީފާތައް އަދާކުރައްވަމުން "ހަފުތާ" އަދި "އާފަތިސް" ނޫހަށް ލިޔުއްވަމުން ގެންދެވި ބޭފުޅެކެވެ. ޒާހިރު ވަނީ "އާފަތިސް" އަދި "ޖަމާއަތުގެ ހަބަރު" އާއި "ހޮޅުއަށި"ގެ އެޑިޓަރުކަން ކުރައްވާފަ އެވެ.