އެމެރިކާގައި މި އަހަރު އޮންނަ ރިޔާސީ އިންތިޚާބު ކުރިއަށް އޮތް ނޮވެމްބަރު ފަހެއްގައި އޮންނާނެ އެވެ. މި އިންތިޚާބު ކާމިޔާބުކުރައްވާނެ ވަކި ކެންޑިޑޭޓެއް އަދި ކަށަވަރު ނުވި ނަމަވެސް، އިންތިޚާބަށް ފަހު މިހާރު ވެރިކަމުގައި ހުންނެވި ޖޯ ބައިޑަން އެމެރިކާގެ ރައީސްގެ މަގާމުގައި ނުހުންނަވާނެ އެވެ.
އެމެރިކާގައި ކުރިއަށް އޮތް ރިޔާސީ ހަތަރު އަހަރު ވެރިކަމުގައި ހުންނަވާނީ، ނޮމެމްބަރު ފަހެއްގައި އާންމު ވޯޓަކުން އެމެރިކާ ރައްޔިތުން އިޚުތިޔާރުކުރާ ކެންޑިޑޭޓެކެވެ.
މި ފަހަރުގެ އިންތިޚާބުގައި އެންމެ އަޑުގަދަ ދެ ކެންޑިޑޭޓުންނަކީ ރިޕަބްލިކަން ޕާޓީގެ ކެންޑިޑޭޓު ޑޮނަލްޑް ޓްރަމްޕާއި ޑިމޮކްރެޓިކް ޕާޓީގެ ކެންޑިޑޭޓު ކަމަލާ ހެރިސް އެވެ.
އެމެރިކާގެ ވެރިކަން ބަދަލުވެ އަދި ރައީސް ބަދަލުވި ނަމަވެސް، އޮންނަ ޔަގީން ކަމަކީ އެމެރިކާއިން ދުނިޔޭގައި ގެންގުޅޭ ސިޔާސަތަށް މާބޮޑު ބަދަލެއް ނާންނާނެ ކަމެވެ.
މިހެން ކަން އޮތުމުން ކުރިއަށް އޮތް އިންތިޚާބުގައި ވެރިކަން ޓްރަމްޕަށް އަދި ކަމަލާއަށް ލިބިވަޑައިގަތް ނަމަވެސް، މެދުއިރުމަތީގެ ހާލަތަށް -- ފަލަސްތީނަށް މާ ބޮޑު ބަދަލެއް ނާންނާނެކަން ކަށަވަރެވެ.
ފަލަސްތީން މީހުން އެދޭ ގޮތަށް ޔަހޫދީން ހިފާފައި އޮތް އަރަބިންގެ ބިންތައް ޒަޔަނިސްޓުންގެ އަތުން އަތުލައި އެ ބިމު ހައްގުވެރިންނަށް ދޭނެ ރައީސަކު އެމެރިކާގައި ވެރިކަން ކުރައްވާނެ ކަމަށް ފަލަސްތީންގެ އެކަކުވެސް ގަބޫލެއް ނުކުރެ އެވެ.
ޑޮނަލްޑް ޓްރަމްޕް މީގެ ކުރިން ވެސް ވަނީ އެެމެރިކާގެ ރައީސްގެ މަގާމު ހަތަރު އަހަރު އަދާކުރައްވާފަ އެވެ. އޭނާގެ ވެރިކަމުގައި -- ޣައްޒާގައި މިހާރު އެ ހިނގާ ވަރުގެ ފަނާކުރަނިވި ހަނގުރާމައެއް ފަލަސްތީންގައި ނުހިނގި ނަމަވެސް، ގުދުސްގެ ވެރިކަން ޔަހޫދީންނަށް ވަނީ ދެއްވާފަ އެވެ. އަދި ތެލްއަވީވްގައި ހުރި ގައުމުތަކުގެ އެމްބަސީތައް ގުދުސްއަށް ބަދަލުކުރަން ހިތްވަރުދެއްވައި ވަނީ ވަކާލާތުކުރައްަވާފަ އެވެ.
އެމެރިކާގެ ރައީސްގެ މަގާމުު މިއިން ކޮންމެ ކެންޑިޑޭޓަކަށް ލިބުނު ނަމަވެސް، ޔަހޫދީންގެ މައްސަލަހަތު ހިމާޔަތްކުރެއްވުމަށް ވަރަށް ބޮޑު އިސްކަމެއް ދެއްވާނެ އެވެ. އަދި ޔަހުދީންނަށް އާބާދީތައް އިތުރުކުރުމަށް ވެސް އެމެރިކާ ރުހުން ދޭނެ އެވެ.