އަގުހެޔޮކޮށް އުމްރާއަށް ދެވޭނެ ޕެކޭޖުތަކެއް ތައާރަފްކޮށްދިނުމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު އެދިވަޑައިގެންފި އެވެ.
މިނިސްޓަރު މިކަަމަށް އެދިވަޑައިގަތީ ދިވެހި ރައްޔިތުން ހައްޖާއި އުމްރާއަށް ގެންދާ ފަރާތްތަކާ އެކު ރާއްޖޭގައި ބާއްވާ ފުރަތަމަ "ހައްޖު އުމްރާ ކޮންފަރެންސް" އިފްތިތާހް ކުރުމަށް މިއަދު އިސްލާމީ މަރުކަޒުގައި ބޭއްވި ރަސްމިއްޔާތުގައި ވާހަކަދައްކަވަމުންނެވެ.
ޝަހީމް ވިދާޅުވީ އުމްރާއަށް މީހުން ގެންދާ ގުރޫޕްތަކުން މިހާރު އެކަން ކުރަނީ ވަކި ދުވަސްވަރަކު ވަކި މުނާސަބަތަކާ ގުޅުވައިގެން ކަހަލަ ގޮތަކަށް ކަމަށެވެ. ނަމަވެސް އަހަރުގެ ކޮންމެ ދުވަހަކުވެސް އުމްރާއަށް ދެވޭނެ އަގުހެޔޮ ފަސޭހަ ގޮތަކަށް ނިޒާމު ބަދަލުކުރަންޖެހޭ ކަމަށްވެސް ވިދާޅުވި އެވެ.
"އެކަމަކު އެއީ މިނިސްޓްރީން ކުރަންޖެހޭ މަސައްކަތެއް ކަމަކަށް ނުދެކެން،" ޝަހީމް ވިދާޅުވި އެވެ.
މިނިސްޓަރު ވިދާޅުވީ އުމްރާ ދަތުރުތައް އަގު ހެޔޮ ކުރެވޭނެ އެއް ގޮތަކީ މައްކާގެ ހަރަމްފުޅާ ދުރުން ހޮޓާތައް ނެގުން ކަމަށެވެ. އެހެންކަމުން އަގުހެޔޮ ޕެކޭޖުތަކެއް ތައާރަފް ކުރެވޭނެ ގޮތްތަކެއް ހޯދައިދިނުމަށް އެދިވަޑައިގެންނެވި އެވެ.
އުމްރާ ޕެކޭޖްތަކުގެ އަގުތައް ހުރި ގޮތުން އެ އަގުތަކުގައި ކޮންމެ މީހަކަށް އުމްރާއަށް ނުދެވޭނެކަން ފާހަގަކުރައްވައި ޝަހީމް ވިދާޅުވީ 20،000 ރުފިޔާއާއި 15،000 ރުފިޔާގެ ޕެކޭޖުތަކެއް ހެދިއްޖެނަމަ ވަރަށް ގިނަ ބަޔަކަށް އުމްރާއަށް ދެވޭނެ ކަމަށް ބެލެވޭ ކަމަށެވެ.
އުމްރާ ޕެކޭޖުތައް މިހާރު އުޅެނީ 28،000 ރުފިޔާ އާއި 37،000 ރުފިޔާއާ ދެމެދުގެ އަގުތަކެއްގައެވެ.