މުވާސަލާތީ ކުންފުނި -- ދިރާގަށް މި އަހަރުގެ ތިންވަނަ ކުއާޓަރުގައި އާމްދަނީގެ ގޮތުގައި 691.1 މިލިއަން ރުފިޔާ ލިބިއްޖެ އެވެ.
މިއީ މި އަހަރުގެ ދެވަނަ ކުއާޓަރުގައި ދިރާގަށް ލިބުނު އާމްދަނީއަށްވުރެ އިތުރުވުމެކެވެ. ދެވަނަ ކުއާޓަރުގައި ދިރާގަށް އާމްދަނީގެ ގޮތުގައި ލިބުނީ 687.2 މިލިއަން ރުފިޔާ އެވެ.
އެންމެ ބޮޑު އާމްދަނީއެއް ދިރާގަށް މި އަހަރުގެ ތިން ކުއާޓަރުގައި ލިބުނީ މޯބައިލް ހިދުމަތްތަކުންނެވެ.
އެ ގޮތުން މޯބައިލް ހިދުމަތްތަކުން 363.3 މިލިއަން ރުފިޔާގެ އާމްދަނީއެއް ލިބުނުއިރު ފިކްސްޑް، ބްރޯޑްބޭންޑް އަދި އެންޓަޕްރައިސް ހިދުމަތްތަކުން 306.7 މިލިއަން ރުފިޔާގެ އާމްދަނީއެއް ލިބުނެވެ.
މީގެ އިތުރުން އެހެނިހެން ހިދުމަތްތަކުން މި އަހަރުގެ ތިންވަނަ ކުއާޓަރުގައި 21 މިލިއަން ރުފިޔާގެ އާމްދަނީއެއް ދިރާގަށް ވަނީ ލިބިފަ އެވެ.
ޓެކުހަށް ކެނޑުމުގެ ކުރިން މި އަހަރުގެ ތިންވަނަ ކުއާޓަރުގެ ފައިދާއަކީ 282 މިލިއަން ރުފިޔާ އެވެ. ޓެކުހަށް ކެނޑުމަށްފަހު މި އަހަރުގެ ތިންވަނަ ކުއާޓަރުގައި ދިރާގަށް ފައިދާގެ ގޮތުގައި 241.2 މިލިއަން ރުފިޔާ ލިބުނެވެ.