އެމެރިކާގައި އަންނަ އަންގާރަ ދުވަހު އޮންނަ ރިޔާސީ އިންތިހާބުގައި، ޑިމޮކްރެޓިކް ޕާޓީގެ ކެންޑިޑޭޓުގެ ގޮތުގައި ވާދަކުރައްވާ -- އެމެރިކާގެ މިހާރުގެ ނައިބު ރައީސް ކަމަލާ ހެރިސް ތުހުމަތު ކުރައްވާ ގޮތުގައި، ޑޮނަލްޑް ޓްރަމްޕަށް ވެރިކަން ލިބިވަޑައިގެންފިނަމަ އިދިކޮޅު ލީޑަރުންނަށް އޮތް ތަނަކީ ޖަލެވެ.
އެކަމަކު ކަމަލާ ވިދާޅުވަނީ އޭނާއަށް ވެރިކަން ލިބިވަޑައިގެންފިނަމަ، މަޝްވަރާ މޭޒު ދޮށުން އިދިކޮޅަށް ފުރުސަތު އޮންނާނެ ކަމަށެވެ.
"ތެދެއް،" ކަމަލާ ވިދާޅުވި އެވެ. "މަޝްވަރާ މޭޒުގެ އެ ފަރާތް އިދިކޮޅަށް ހާއްސަކުރާނަން"
ކަމަލާ ވިދާޅުވި ގޮތުން ލީޑަރުންނަށް، މީހުން ގެންގުޅެން އެނގެން ޖެހޭނެ އެވެ. މުޖުތަމައުތަކާއި އާބާދީތައް ކުރިއަރައި ސިނާއަތްތައް ތަރައްގީކޮށްފައި އޮތީ ދެން ތިބި މީހުންނާ މެދު ލީޑަރުން ހެޔޮކޮށް ހިތައިގެން ކަމަށްވެސް ވިދާޅުވި އެވެ.
ކެމްޕޭން އެއްވުމެއްގައި ވާހަކަދައްކަވަމުން ކަމަލާ ވިދާޅުވީ އިލްމުވެރިންނާއި ފަންނުވެރިންގެ ހިއްސާ އޭނާގެ ސަރުކާރެއްގައި ބޮޑުވާނެ ކަމަށެވެ. ރައީސްކަން ލިބިވަޑަގެންފިނަމަ ފަންނާނުންނާއި ސިނާއީ އިލްމުވެރިންނަކީ އެމެރިކާގައި މުހިއްމު ބައެއް ކަމަށް ހައްދަވާނެ ކަމަށްވެސް ވިދާޅުވި އެވެ.
ޑޮނަލްޑް ޓްރަމްޕަށް ކަމަލާގެ އޮތް މި ތުހުމަތަކީ، ކެމްޕޭން އެއްވުންތަކުގައި ޓްރަމްޕް ވިދާޅުވާ ވިދާޅުވުންތަކުގެ ދޭހައަށް ކުރެއްވި ތުހުމަތެކެވެ.
ޓްރަމްޕަށް ތާއިދުކުރާ އެތައް ހާސް ބަޔަކާ މުހާތަބުކުރައްވައި ކެމްޕޭން އެއްވުމެއްގައި އޭނާ ވިދާޅުވީ ކަމަލާ ހެރިސް އަކީ ޝަރީއަތަށް ހާޒިރުކުރަން ޖެހިވަޑައިގެންފައިވާ ލީޑަރެއް ކަމަށެވެ. އޭނާގެ ވެރިކަމެއްގައި، ކަމަލާ ކަހަލަ ހުރިހާ މީހުންނާ ދެކޮޅަށް ޝަރީއަތް ކުރައްވާނެ ކަމަށްވެސް ޓްރަމްޕް ވިދާޅުވި އެވެ.