ބްރެޒިލްގެ ރައީސް ލުއިޒް އިނާޝިއޯ ލޫލާ ޑާ ސިލްވާ ދެކެވަޑައިގަންނަވާ ގޮތުގައި އެމެރިކާގައި ޑިމޮކްރަސީ ދެމެހެއްޓުމަށްޓަކައި އަންގާރަ ދުވަހު އޮންނަ ރިޔާސީ އިންތިހާބުގައި -- ޑިމޮކްރެޓިކް ރިޔާސީ ކެންޑިޑޭޓު، ކަމަލާ ހެރިސްއަށް ވޯޓުދިނުން ލާޒިމެވެ.
އެމެރިކާގެ ރައީސްގެ މަގާމަށް ހޮވުމަށް އޭނާގެ އިހްތިޔާރަކީ ކަމަލާ ހެރިސް ކަމަށްވެސް ލޫލާ ވިދާޅުވި އެވެ. އެ ނޫން މީހަކު ވެރިކަމަށް ހޮވައިފިނަމަ އެމެރިކާގެ ރިޔާސީ ނިޒާމު ފޫވެއްޓިދާނެ ކަމަށް ލޫލާ ދެކެވަޑައިގަންނަވަ އެވެ.
އެކްސްގައި މެސެޖްކުރައްވައި ލޫލާ ވިދާޅުވީ ޒަމާނީ ވެރިކަމުގެ ނިޒާމަކަށް އެންމެ ރަނގަޅީ ޑިމޮކްރަސީ ކަމަށެވެ. މި ސަބަބަށްޓަކައި އެމެރިކާގެ ރިޔާސީ ގޮނޑި، ކަމަލާ ހެރިސް ނޫން ކެންޑިޑޭޓަކަށް ދިނުން ބުއްދިވެރި ނޫން ކަމަށް ބްރެޒިލްގެ ރައީސް ވިދާޅުވި އެވެ.
ލޫލާ ވިދާޅުވީ ވެރިކަމަށް ވަޑައިގަތުމަށް ރިޕަބްލިކަން ރިޔާސީ ކެންޑިޑޭޓް ޑޮނަލްޑް ޓްރަމްޕް ގިނައިން ހައްދަވަނީ ދޮގު ކަމަށެވެ. ޓްރަމްގެ ވެރިކަމެއްގައި ގުޅުން ގާއިމުކުރުމަށް ގައުމުތަކަށް ދަތި ކަމަށްވެސް ވިދާޅުވި އެވެ.
ރުޅިވެރިކަމާއި ދޭތެރެޖެއްސުމަކުން ކުރެވޭނެ ފައިދާ ހުރި އެއްވެސް ކަމެއް ނެތް ކަމަށްވެސް ލޫލާ ދެކެވަޑައިގަންނަވަ އެވެ. ދޮގުހެދުމާއި އޮޅުވާލުން ރިޕަބްލިކަން ކެންޑިޑޭޓުގެ ކިބާގައި ތަންކޮޅެއް ގިނައީ ކަމަށް ލޫލާ ވިދާޅުވި އެވެ.
ލޫލާގެ އިހްތިޔާރަކަށް ކަމަލާ ވެފައި ވާއިރު، ނުފޫޒުގަދަ ބައެއް އެހެން ލީޑަރުންނާޢި ކުންފުނިތަކުގެ ވެރިންވެސް މިހާރު ތިބީ ވަކި ކޮޅެއް ނަގައި، ތާއީދުކުރާނެ ކެންޑިޑޭޓެއްގައި ހުނިޖަހައިގެންނެވެ.
މިގޮތުން ހަންގޭރީގެ ބޮޑުވަޒީރު ވިކްތަރު އޯބަން ހުންނެވީ ޓްރަމްޕަށް ވަފާތެރި ލީޑަރެއްގެ ގޮތުގަ އެވެ. އޭނާ ވިދާޅުވީ އެދިވަޑައިގަންނަވާ ގޮތަކީ ޑޮނަލްޑް ޓްރަމްޕަށް އެމެރިކާގެ ރައީސްކަން ލިބިވަޑައިގަތުން ކަމަށެވެ.
އެމެރިކާގެ މަޝްހޫރު ވިޔަފާރިވެރިޔާ އީލޮން މަސްކް ވެސް ހުންނެވީ ޓްރަމްޕާ އެއްސަފެެއްގަ އެވެ. އޭނާގެ ޖީބުން ހަރަދުކުރައްވައި، ޓްރަމްޕް ވެރިކަމަށް ހޮއްވެވުމަށް މަސްކް ވަނީ ބޮޑެތި ހޭދަތައްވެސް ކުރައްވާފަ އެވެ.
މަސްކް ކޮށްދެއްވާ މަސައްކަތްތަކަށް ތާއީދުކުރައްވައި ޑޮނަލްޑް ޓްރަމްޕް ވިދާޅުވީ، ވެރިކަން ލިބިވަޑައިގެންފި ނަމަ ނުފޫޒު ގަދަ މަގާމެއް އީލޮން މަސްކަށް ދެއްވާނެ ކަމަށެވެ.