އެމެރިކާގެ ރިޔާސީ އިންތިހާބުގެ ވޯޓުލުން މިއަދު ބޭއްވުމަށް ހަމަޖެހިފައިވާއިރު، ވެރިކަންކުރާ ޑިމޮކްރެޓިކް ޕާޓީގެ ފަރާތުން ވާދަކުރައްވާ ނައިބު ރައީސާ ކަމަލާ ހެރިސް މިހާރު ވަނީ އާލީ ވޯޓިންގެ ދަށުން ވޯޓުލައްވައިފި އެވެ.
މިޝިގަން ސްޓޭޓުގެ ޑިޓްރޮއިޓުގައި ނޫސްވެރިންނާ މުހާތަބު ކުރައްވަމުން ހެރިސް ވިދާޅުވި ގޮތުގައި ޕޯސްޓް މެދުވެރިކޮށް ވޯޓު ފޮނުއްވާފައިވަނީ އޭނާ ރަޖިސްޓަރީވެފައިވާ ސްޓޭޓު ކަމަށްވާ ކެލިފޯނިއާ އަށެވެ.
ވޯޓުލުމުގެ ހައްގު ލިބިގެންވާ ރައްޔިތުން މިހާރުވެސް ވަރަށް ބޮޑަށް އިޖާބަދެމުންދާކަން ފާހަގަކުރެވެ އެވެ. ފްލޮރިޑާ ޔުނިވަސިޓީގެ އިލެކްޝަން ލެބުގެ ތަފާސްހިސާބުތަކުން ދައްކާ ގޮތުގައި އާލީ ވޯޓިންގެ ދަށުން މިހާތަނަށް 78 މިލިއަން މީހުން ވޯޓުލާފައިވެ އެވެ. މިއީ 2020 ވަނަ އަހަރުގެ އިންތިހާބުގައި އާލީ ވޯޓިންގެ ދަށުން ވޯޓުލި 160 މިލިއަން މީހުންގެ ދެބައިކުޅައެއްބައެވެ. 2020ގެ އިންތިހާބަކީ އެމެރިކާގެ ތާރީހުގައި އެންމެ ގިނަ މީހުން ވޯޓުލި އިންތިހާބެވެ.
އެންމެ ފަހުގެ ހިޔާލު ހޯދުމުގެ ސާވޭތަކުން ދައްކާ ގޮތުގައި މިވަގުތު އެއްވެސް ކެންޑިޑޭޓަކަށް ފާހަގަކުރެވޭ ކުރިއެރުމެއް ނެތެވެ. ނަމަވެސް ވަކިވަކި ޖަމާއަތްތަކަށް ބަލާއިރު އަންހެނުންގެ މެދުގައި 60 އަހަރުގެ ހެރިސްއަށް ތާއީދު ބޮޑެވެ. އަނެއްކޮޅުން ހިސްޕެނިކް ވޯޓަރުންގެ މެދުގައި، ހާއްސަކޮށް ފިރިހެނުންގެ މެދުގައި ތާއީދު ބޮޑީ 78 އަހަރުގެ ޓްރަމްޕަށެވެ.
ދެ ކެންޑިޑޭޓުންވެސް މިވަގުތު އެންމެ އިސްކަމެއް ދެއްވަނީ "ސްވިން ސްޓޭޓް" ތަކުގެ ވޯޓު ހޯދުމަށެވެ. މީގެ ތެރޭގައި މިޝިގަން، ޕެންސިލްވޭނިއާ، އެރިޒޯނާ، ޖޯޖިއާ އަދި ވިސްކޮންސިން ހިމެނެ އެވެ.
ސްވިން ސްޓޭޓް ތަކަކީ ކޮންމެ އިންތިހާބެއްގައިވެސް ކާމިޔާބުކުރާ ޕާޓީ ބަދަލުވަމުންދާ ނުވަތަ ދެ ޕާޓީގެ މެދުގައި ވަރަށް ގާތް ވާދައެއް އޮންނަ ސްޓޭޓު ތަކެވެ.
ރިޔާސީ އިންތިހާބާއެކު، ކޮންގްރެސްގެ ހުސްވެފައިވާ ގޮނޑިތަކަށްވެސް ވޯޓުލެވޭނެ އެވެ. ކޮންގްރެސްގެ މަތީ މަޖިލިސް (ސެނެޓް) ރިޕަބްލިކަނުން ކާމިޔާބުކުރާނެކަމަށް ލަފާކުރެވޭއިރު ތިރީ މަޖިލިސް (ހައުސް އޮފް ރެޕްރެޒެންޓޭޓިވްސް) އަގުލަބިއްޔަތު ޑިމޮކްރެޓުންނަށް ލިބޭނެކަމަށް ހިޔާލު ހޯދުމުގެ ސާވޭތަކުން ދައްކަ އެވެ.
ހެރިސް ވަނީ ޑިޓްރޮއިޓުގައި ދެއްކެވި ވާހަކަފުޅުގައި "ކުރިއަށް އޮތް ދެ ދުވަހުގެ ތެރޭގައި ގައުމުގެ މިސްރާބު، އަދި ކުރިއަށް އޮތް ޖީލުތަކުގެ މުސްތަގުބަލު ނިންމާނެ ގޮތެއް ކަނޑައެޅުމުގެ ފުރުސަތު" ލިބިގެންދާނެ ކަމަށް ވިދާޅުވެފަ އެވެ. އަދި އީސްޓް ލެންސިންގައި ޢަރަބި-އެމެރިކާ ދަރިކޮޅުގެ މީހުންނާ ބައްދަލުކުރައްވައި، ޣައްޒާގައި ހިނގަމުންދާ އަނިޔާވެރި އަމަލުތައް ހުއްޓުވުމަށް މަސައްކަތްކުރައްވާނެ ކަމަށް ހެރިސް ވައުދުވެވަޑައިގެންފައި ވެއެވެ.
އެހެންނަމަވެސް މަސްރަހް ދިރާސާކުރާ ފަރާތްތަކުން ފާހަގަކުރާ ގޮތުގައި ޓްރަމްޕަށް އިންތިހާބު ކާމިޔާބުވެއްޖެނަމަ މެދުއިރުމަތީގެ ހާލަތު އިތުރަށް ގޯސްވެ، އީރާން ފަދަ ގައުމުތަކަށް އިތުރު ނުރައްކާތަކާ ކުރިމަތިލާން ޖެހިދާނެ އެވެ. އެހެނީ އީރާނަށް ހަމަލާދޭން ބޭނުންފުޅުވާ ކަމަށް ޓްރަމްޕް ކުރިން ވިދާޅުވެފައިވާތީ އެވެ.
ނަމަވެސް އަރަބި-އެމެރިކާ މީހުންގެ ބޮޑު އަބާދީއެއް އޮތް ޑިއަބޯންގައި ވާހަކަފުޅު ދައްކަވަމުން ޓްރަމްޕް ވިދާޅުވެފައިވަނީ މެދުއިރުމަތީގެ ހަމަނުޖެހުންތައް ހުއްޓުވުމަށް މަސައްކަތް ކުރައްވާނެ ކަމަށެވެ.
ކެމްޕޭނުގެ ތެރޭގައި ޓްރަމްޕްގެ ފުރާނައަށް އަމާޒުކޮށް ބަޑި ޖެހުމުގެ ހާދިސާއެއްވެސް ހިނގައިފައި ވެއެވެ. ޖުލައި މަހު މިކަން ހިނގުމަށްފަހު، އެންމެހައި ކެމްޕޭން ޖަލްސާތަކުގައި އޭނާ ވާހަކަފުޅު ދައްކަވަނީ ބުލެޓްޕްރޫފް ބިއްލޫރީގެ ފަހަތުގައި ހުންނަވައިގެންނެވެ.