އެމެރިކާގެ ރިޔާސީ އިންތިހާބުގައި ކާމިޔާބު ކުރެވިއްޖެ ކަމަށް ކުރީގެ ރައީސް އަދި ރިޕަބްލިކަން ޕާޓީގެ ކެންޑިޑޭޓް ޑޮނަލްޑް ޓްރަމްޕް އިއުލާން ކުރައްވައިފި އެވެ.
ނަމަވެސް ޓްރަމްގެ ވާދަވެރި ޑިމޮކްރެޓިކް ޕާޓީގެ ކެންޑިޑޭޓް އަދި އެމެރިކާގެ މިހާރުގެ ނައިބު ރައީސް ކަމާލާ ހެރިސް އަދިވެސް ބަލި ގަބޫލެއް ނުކުރައްވަ އެވެ.
ޓްރަމްޕް ކާމިޔާބީ އިއުލާންކުރައްވާފައި މިވަނީ މުހިއްމު ބެޓަލްގްރައުންޑް ސްޓޭޓްތަކުގެ ތެރެއިން ޕެންސިލްވޭނިއާ، ނޯތު ކެރޮލައިނާ އަދި ޖޯޖިއާ އޭނާއަށް ކާމިޔާބުވާނެ ކަމަށް ގާތްގަނޑަކަށް ޔަގީންވުމާ ގުޅިގެންނެވެ.
އެސޯސިއޭޓެޑް ޕްރެސް އިން ވަނީ ރިޕަބްލިކަން ޕާޓީ އިން އެމެރިކާގެ ސެނެޓުގެ ކޮންޓްރޯލްވެސް އަލުން ހޯދާނެ ކަމަށް ލަފާކޮށްފަ އެވެ.
ޓްރަމްޕްގެ ކާމިޔާބީއާ ގުޅިގެން ދުނިޔޭގެ ލީޑަރުން ގެންދަވަނީ މަރުހަބާ ވިދާޅުވަމުންނެވެ.
ފްރާންސްގެ ރައީސް އެމެނުއެލް މެކްރޯން ވިދާޅުވީ މީގެ ކުރިން ޓްރަމްޕްއާ އެކު ހަތަރު އަހަރު ދުވަހު މަސައްކަތް ކުރި ފަދައިން އަދިވެސް އެކުގައި މަސައްކަތް ކުރެއްވުމަށް ތައްޔާރަށް ހުންނެވި ކަމަށެވެ.
އިޒްރޭލުގެ ބޮޑުވަޒީރު ބެންޖަމިން ނެތަންޔާހޫ ވިދާޅުވީ "އެންމެ މޮޅު ކަމްބެކް" ހެއްދެވި ލީޑަރަށް މަރުހަބާ ވިދާޅުވާ ކަމަށެވެ.
އޮސްޓްރިއާގެ ޗާންސެލާ ކާލް ނެހަމަ ވިދާޅުވީ ދުނިޔެއަށް ހުރި ގޮންޖެހުންތަކާ ކުރިމަތިލުމަށް ޓްރާންސްއެޓްލާންޓިކް ގުޅުން އިތުރަށް ފުޅާކުރުމަށް އުއްމީދު ކުރައްވާ ކަމަށެވެ.
ވެސްޓް ޕާމް ބީޗްގައި ދެއްކެވި ވާހަކަފުޅުގައި ޓްރަމްޕް ވިދާޅުވީ އިގްތިސާދު އާރާސްތު ކުރުމަށާއި ތިމާވެށި ރައްކާތެރިކުރުމަށް މަސައްކަތް ކުރައްވާނެ ކަމަށެވެ. ނަމަވެސް އެކަންކަން ކުރައްވާނެ ގޮތުގެ ތަފްސީލް ހިއްސާކުރައްވާފައެއް ނުވެ އެވެ.