މިސަރުކާރު މިސްރާބު ޖަހާފައިވަނީ ހުދުމުހުތާރު ވެރިކަމަކާ ދިމާލަށް ކަމަށް ރައްޔިތުންގެ މަޖިލީހުގެ ކެންދޫ ދާއިރާގެ އެމްޑީޕީ މެންބަރު މައުރޫފު ޒާކިރު ވިދާޅުވެއްޖެ އެވެ.
ސިޔާސީ ޕާޓީގެ ގާނޫނަށް ސަރުކާރުގެ ފަރާތުން ދިއްދޫ ދާއިރާގެ މެންބަރު އަބްދުއްލަތީފް ހުށަހެޅުއްވި އިސްލާހު ގެނައުމުގެ ބިލުގެ ބަހުސްގައި މައުރޫފް މިއަދު ވިދާޅުވީ ޕާޓީތައް ޖޫރިމަނާކުރެވޭ އަދަދު ބޮޑުކުރަނީ ސިޔާސީ ޕާޓީތައް އޮބަހައްޓަން ކަމަށެވެ.
"މި ފެންނަނީ މުޅި ރާއްޖޭގެ ހުރިހާ މިނިވަން މުއައްސަސާތަކެއް ރައީސުލްޖުމްހޫރިއްޔާގެ އަތް ދަށަށް ގެނެވޭ މަންޒަރު. އަޅުގަނޑުމެންނަށް މި ފެންނަނީ މުޅި ގައުމު ހުދުމުހުރާތު ވެރިކަމަކާ ދިމާލަށް ގެންދާ މަންޒަރު. އެހެންވީމާ ސިޔާސީ ޕާޓީތައް އޮބަހައްޓަން ޖޫރިމަނާތައް ބޮޑުކޮށް މިކަންކަން ކުރާނީ،" މައުރޫފު ވިދާޅުވި އެވެ.
ސިޔާސީ ޕާޓީގެ ގާނޫނަށް ހުށަހެޅި އިސްލާހުގައި ދައުލަތުގެ ބަޖެޓުން ޕާޓީތަކަށް ފައިސާ ދޭ އުސޫލު ބަދަލުކުރަން ހިމަނާފައިވެ އެވެ.
ގާނޫނުގައި މިހާރު އޮތް ގޮތުން ސިޔާސީ ޕާޓީ ހިންގަން ދައުލަތުގެ ބަޖެޓުން ދެނީ ދައުލަތުގެ އަހަރީ ބަޖެޓުގެ 0.1 ޕަސެންޓާއި 0.2 ޕަސެންޓާ ދެމެދުގެ އަދަދެކެވެ. އިސްލާހުގައި އެ އަދަދު އެ އަހަރަކަށް ލަފާކުރާ އާމްދަނީގެ 0.1 ޕަސެންޓާއި 0.2 ޕަސެންޓާ ދެމެދުގެ އަދަދަކަށް ކަނޑައެޅުމަށް ވަނީ ހިމަނާފަ އެވެ.
މި އިސްލާހާއެކު ސިޔާސީ ޕާޓީތަކަށް ދައުލަތުގެ ބަޖެޓުން ލިބޭ އާމްދަނީ ދަށްވާނެ ކަމަށް މައުރޫފު ވިދާޅުވި އެވެ. އަދި މި އިސްލާހު ހުށަހަޅައި ޕީއެންސީގެ މެންބަރުންގެ އަދަދު އިތުރުކުރަމުންދާތީ އޭނާ ވަނީ ސުވާލު އުފައްދަވާފަ އެވެ.
"އަޅުގަނޑުގެ ސޯސްތަކުން މައުލޫމާތު ލިބޭ ގޮތުގައި ގާތްގަނޑަކަށް އެއް ލައްކައެއްހާ ޕީއެންސީ މެންބަރުން މި އަހަރު ނިމެންވާއިރަށް ތިބޭނެ. އެހެންވީމާ ގާތްގަނޑަކަށް ގައުމު އެކީހެން މި ވަންނަނީ ޕީއެންސީއަށް،" މައުރޫފު ވިދާޅުވި އެވެ.
އޭނާ ވިދާޅުވި ގޮތުގައި މި ބަދަލު ގެންނަނީ ބޮޑު އަދަދެއް ސިޔާސީ ޕާޓީއެއްގެ ގޮތުގައި ޕީއެންސީއަށް ހޯދުމަށެވެ.