މަގު ކުނި ކެހުމަށް ބޭނުންކުރާ ހާއްސަ އުޅަނދެއް ވެމްކޯ އިން ރާއްޖެ ގެނެސްފި އެވެ.
ވެމްކޯގެ އޮފިޝަލަކު މިއަދު އަވަސްއަށް ވިދާޅުވީ މި ވެހިކަލް ބޭނުންކުރާނީ ހުޅުމާލޭގެ ތާރު މަގުތައް ސާފުކުރުމަށް ކަމަށެވެ.
މި އުޅަނދަކީ މަގު ކުނިކެހުމުގެ އިތުރުން ފެން ޖެހުމަށްވެސް ބޭނުން ކުރެވޭނެ އުޅަނދެއް ކަމަށް އޮފިޝަލް ވިދާޅުވި އެވެ.
"މާލޭގެ މަގުތަކުގައި ގާ އަތުރާފައި ހުރުމުން މި އުޅަނދު މާލޭގައި ބޭނުންކުރުމަށް އެބަހުރި ދަތިތަކެއް،" އޭނާ ވިދާޅުވި އެވެ.
ވެމްކޯގެ އާ މެނޭޖުމަންޓުން ދަނީ އެ ކުންފުނީގެ ހިދުމަތްތައް ފުޅާކޮށް އާ ކަންކަން ތައާރަފްކޮށްގެން ކުންފުންޏަށް ލިބޭ އާމްދަނީ އިތުރުކުރުމަށް މަސައްކަތް ކުރަމުންނެވެ.
ވެމްކޯ އިން ބުނީ ހަރަދު ކުޑަކުރުމަށާއި އާމްދަނީ އިތުރުކުރުމަށް ކުރާ މަސައްކަތުގެ ނަތީޖާ މަޑުމަޑުން ފެންނަން ފަށާފައިވާ ކަމަށެވެ.