އިމާރާތްތައް ތަޅައިދިނުން ނުވަތަ ޑިމޮލިޝިންގެ ހިދުމަތް ދިނުމަށް ވެމްކޯ އިން ތައްޔާރުވާން ފަށައިފި އެވެ.
ސަރުކާރުގެ ސަތޭކަ ޕަސަންޓް ހިއްސާ އޮތް ކުންފުނި -- ވެމްކޯގެ އޮފިޝަލަކު ވިދާޅުވީ އަންނަ އަހަރުގެ ކުރީކޮޅު ޑިމޮލިޝިންގެ ހިދުމަތް ދިނުމަށް އެ ކުންފުނިން ތައްޔާރުވަމުންދާ ކަމަށެވެ.
ޑިމޮލިޝިންގެ ހިދުމަތް ފުރަތަމަ ދިނުމަށް ހަމަޖައްސާފައިވަނީ މާލެ ސަރަހައްދު ގައެވެ.
މާލޭގައި ތަޅާލާފައި ހުންނަ އިމާރާތްތަކުގެ އުކާލަންޖެހޭ ބައިތައް ނަގައި އުކާލުމުގެ ހިދުމަތް މިހާރުވެސް ވެމްކޯ އިން ދެއެވެ.
އޮފިޝަލް ވިދާޅުވީ ވެމްކޯ އަކީ ކުނި ނަގައިގެން ކުނި މެނޭޖުކުރާ ކުންފުންޏަކަށްވާތީ ޑިމޮލިޝިންގެ ހިދުމަތް އެ ކުންފުނިން ފެށުމަކީ ބައެއް އާންމުންވެސް އެދޭ ކަމެއް ކަމަށެވެ.
"އަނެއްކާ މިއީ އަޅުގަނޑުމެން މިހާރުވެސް ކުރާ ޒާތުގެ މަސައްކަތެއް. މިމަސައްކަތް ފެށުމުން ކުންފުންޏަށް އެ ހުޅުވެނީ އާމްދަނީވެސް ލިބޭ އިތުރު ދޮރެއް،" އޭނާ ވިދާޅުވި އެވެ.
ރައީސް އަބްދުﷲ ޔާމީންގެ ވެރިކަމުގައި ވެމްކޯ އުފެއްދީ 2017 ވަނަ އަހަރު އެވެ. ކުރިން މާލެ ސަރަހައްދުގައި އެކަނި ހިދުމަތް ދެމުން ދިޔަ ކުންފުނި -- ވެމްކޯ މިހާރު ގެންދަނީ މުޅި ރާއްޖެއަށް ހިދުމަތް ފުޅާކުރަމުންނެވެ.