މަޖީދީ މަގުގައި ހުންނަ ޒިއޯން މޯބައިލްސްގެ 4 ނަމްބަރު ފިހާރަ ފަޅާލުމާ ގުޅިގެން ހައްޔަރުކޮށްފައިވާ މީހާގެ ބަންދަށް މިއަދު 20 ދުވަސް ދީފި އެވެ.
މިމައްސަލައިގެ ތުހުމަތުގައި ހައްޔަރުކޮށްފައިވަނީ ހއ. މާރަންދޫ، ފިނިރޯޅި، އަހްމަދު ނިޔާޒު (47 އ) އެވެ.
ފުލުހުން ބުނީ އެ ފިހާރަ އިން ވައްކަން ކުރީ އިއްޔެ ފަތިހު 5:35 ހާއިރު ފިހާރައިގެ މައި ދޮރުގެ ބިއްލޫރިގަނޑު ތަޅާލައި އެތަނަށް ވަދެގެން ކަމަށެވެ.
ވައްކަމާ ގުޅޭ މިމައްސަލައިގެ ސީސީޓީވީ ފްޓޭޖު ސޯޝަލްމީޑިއާގައި އާންމުކޮށްފައިވާއިރު ވީޑިއޯ އިން ފެންނަނީ ވަރަށް ހަމަޖެހިލައިގެން ވައްކަން ކުރި މީހާ ބޭނުންވާ ތަކެތި ކޮތަޅުތަކަކަށް އަޅައިގެން ހިފައިގެންދާ މަންޒަރެވެ. މި މަންޒަރު އެ ސަރަހައްދުން ދިޔަ ބައެއް އާންމުންނަށް ފެންނާނެ ކަމަށްވެސް ބެލެވެ އެވެ.
ޒިއޯން ފިހާރަ އިއްޔެ ފަޅާލުމާއެކު ފުލުހުން ކުރި މަސައްކަތުން ތުހުމަތު ކުރެވޭ މީހާ އިއްޔެގެ ވަގުތެއްގައި ވަނީ ހައްޔަރުކޮށްފަ އެވެ.
ފިހާރަ އިން ވައްކަން ކުރި މީހާ ވަގަށް ނެގި ބައެއް ތަކެތި ފުލުހުން ހޯދާއިވާ ކަމަށްވެސް މައުލޫމާތު ލިބެ އެވެ.
ފިހާރައެއް ފަޅާލައި ވައްކަންކޮށް ކޮށްފައި މިވަނީ ވައްކަމުގެ މައްސަލަ ރިޕޯޓް ކުރާ އަދަދު މަދުވެފައިވާ ކަމަށް ފުލުހުން ބުނެފައި ވަނިކޮށެވެ.