ކުރިއަށް އޮތް 20 އަހަރަށް އަމާޒުކޮށް އެކުލަވާލުމަށް ނިންމާފައިވާ "ގައުމީ ތަރައްގީގެ ޕްލޭން" ތަންފީޒުކުރަން ބާރުއެޅުމަށްޓަކައި ކަމާ ގުޅޭ ގާނޫނެއް އެކުލަވާލައި ގާނޫނުއަސާސީގައިވެސް މިކަމަށް ބާރުއެޅުމަށް މާއްދާއެއް ހިމަނާނެ ކަމުގައި މިނިސްޓާ އޮފް ހައުސިން، ލޭންޑް އެންޑް އާބަން ޑިވެލޮޕްމަންޓް ޑރ. އަލީ ހައިދަރު އަހްމަދު ވިދާޅުވެއްޖެ އެވެ.
ގައުމީ ތަރައްގީގެ ޕްލޭން އިފްތިތާހްކޮށް، އެ ޕްލޭން އެކުލަވާލުމަށްޓަކައި މިއަދު ވަނީ ކަމާ ގުޅޭ މަޝްވަރާތައް ފަށާފަ އެވެ. މިރަސްމިއްޔާތުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒާއި ނައިބް ރައީސް ހުސައިން މުހައްމަދު ލަތީފާއި ވަޒީރުންނާއި ސަރުކާރުގެ އިސްވެރިންނާއި ބައެއް އެހެން ބޭފުޅުންވެސް ބައިވެރިވި އެވެ.
މިރަސްމިއްޔާތުގައި މިނިސްޓަރު ހައިދަރު ވިދާޅުވީ ގިނަ މަސައްކަތްތަކަކަށްފަހު އެކުލަވާލާ ތަރައްގީގެ ޕްލޭން ވާންޖެހޭނީ ކޮންމެ ސަރުކާރެއް އޮތަސް ތަންފީޒު ކުރެވޭ އެއްޗަކަށް ކަމަށެވެ. އެ މަގަށް ކަންކަން ކުރުމަށްޓަކައި މިއަދު އިފްތިތާހް ކުރި ޕްލޭނަށް ގާނޫނީ ބާރުވެރިކަން ގެނެސްދޭނެ ގައުމީ ތަރައްގީގެ ގާނޫނުގެ ބިލެއް އެކުލަވާލާނެ ކަމަށް ވިދާޅުވި އެވެ. އަދި މި ޕްލޭން ދެމެހެއްޓެނިވި ގޮތެއްގައި ތަންފީޒު ކުރުމަށްޓަކައި އިތުރު ގާނޫނީ ބާރުވެރިކަމެއް ދިނުމުގެ ގޮތުން ގާނޫނުއަސާސީއަށްވެސް މާއްދާއެއް އިތުރުކުރުމަށް ސަރުކާރުން ނިންމާފައިވާ ކަމަށްވެސް ވިދާޅުވި އެވެ.
މިނިސްޓަރު ވިދާޅުވި ގިނަ މަސައްކަތްތަކަކަށްފަހު އެކުލަވާލާ ގައުމީ ތަރައްގީގެ ޕްލޭންގައި ހިމަނާ ސިޔާސަތުތަކާއި، އަމާޒުތަކާއި، އިސްތިރާޖުތަކާއި، ލަނޑުދަނޑިތައް ހާސިލުކުރަން އެންމެންވެސް މަސައްކަތް ކުރަންޖެހޭ ކަމަށެވެ. ތަރައްގީގެ ޕްލޭންގައި ގައުމު ތަރައްގީކޮށް ކުރިއަރުވަންވީ ގޮތުގެ މިސްރާބް ކަނޑައެޅި ދަތުރުކުރަންވީ ގޮތުގެ މަގުޗާޓް ކަނޑައެޅިގެންދާނެ ކަމުގައިވެސް ވިދާޅުވި އެވެ.
ހައިދަރު ވިދާޅުވީ ގައުމީ ތަރައްގީގެ ޕްލޭން އެކުލަވާލާނީ މިހާރު ހުރި މައްސަލަތަކާއި ކުރިމަތިވެދާނެ ކަމަށް ފެންނަ މައްސަލަތަކާއި އާ އިޖާދުތަކަށް އިސްކަންދީގެން ހުރިހާ އުމުރުފުރައަކަށްވެސް އަމާޒުކޮށްގެން ކަމަށެވެ. އަދި ޕްލޭންގައި ހިމެނޭ ކަންކަން ތަންފީޒު ކުރުމާއި މޮނިޓާކޮށް އިވެލުއޭޓު ކުރުމުގައި ބަލަންޖެހޭ ކަންކަންވެސް ޕްލޭންގައި ހިމަނާނެ ކަމުގައި ވިދާޅުވި އެވެ.
"މިއީ އަންނަން އޮތް ޖީލުތަކަށް ތަނަވަސް، ފުދުންތެރި، އުފާވެރި ދިވެހިރާއްޖެއެއް ފޯރުކޮށްދިނުމަށް އެޅޭ މުހިއްމު ފިޔަވަޅަކަށް ވާނެ،" މިނިސްޓަރު ވިދާޅުވި އެވެ.
ހައިދަރު ވިދާޅުވީ ތަރައްގީގެ ޕްލޭން ކުރިއަށް އޮތް އެއް އަހަރު ދުވަހުގެ ތެރޭގައި އެކުލަވާލުމަށް މަސައްކަތް ކުރަމުންދާ ކަމަށެވެ. މި ޕްލޭން އެކުލަވާލުމުގެ މަސައްކަތުގައި ކަމާބެހޭ ހުރިހާ ފަރާތްތަކާއި، ރައްޔިތުންގެ ހިޔާލާއި މަޝްވަރާ ފުޅާ ދާއިރާއެއްގައި ހޯދުމަށް ރައީސް ޑރ. މުހައްމަދު މުއިއްޒު ލަފާ ދެއްވާފައިވާ ކަމަށްވެސް ވިދާޅުވި އެވެ. އެހެންވެ އެކި މަންސަތައް މެދުވެރިކޮށް ލަފަޔާއި، އިރުޝާދާއި، ހިޔާލާއި، މަޝްވަރާ ހުށަހެޅުމަށް ފުރުސަތު ހުޅުވާލާނެ ކަމަށާއި ހުރިހާ ފަރާތްތަކަކުންވެސް ހިޔާލާއި މަޝްވަރާ ދިނުމަށްވެސް މިނިސްޓަރު އެދިވަޑައިގެންނެވި އެވެ.
"މުޖުތަމައުގެ ހުރިހާ ފަރާތްތަކާ ފުޅާދާއިރާއެއްގައި މިކަމުގެ މަޝްވަރާ ނުލިބި އެކުލަވާލާ ތަސައްވުރެއް ފުރިހަމައެއް ނުވާނެ،" ހައިދަރު ވިދާޅުވި އެެވެ.
މިނިސްޓަރު އިތުރަށް ވިދާޅުވީ ރާއްޖެއަކީ ތަނަވަސް އުފާވެރި ގައުމަކަށް ހެދުމަށްޓަކައި ގައުމީ ތަރައްގީގެ ޕްލޭނެއް ވަރަށް މުހިއްމު ކަމަށެވެ.