ބެޑްމިންޓަން އެސޯސިއޭޝަނުގެ އިންތިހާބު ފަސްކުރަން ހޯމް މިނިސްޓްރީން އަންގައި، ވޮލީބޯޅަ އެސޯސިއޭޝަނުގެ އިންތިހާބު މިއަދު ބާއްވަން ނިންމައިފި އެވެ.
މި ދެ އިންތިހާބާމެދު ގޮތެއް ނިންމީ އިންތިހާބަށް ނުފޫޒުފޯރުވާ ކަމަށް ބުނެ، ހުށަހެޅުނު މައްސަލަތަކެއް އެންޓި ކޮރަޕްޝަން ކޮމިޝަނުން އިއްޔެ ބަލާފައިވަނިކޮށެވެ.
ވޮލީ އެސޯސިއޭޝަނުގައި ޖެހުނު މައްސަލައަކީ ގަވާއިދާ ހިލާފަކަށް މުއްދަތުހަވި ފަހުން ފަސް ކުލަބެއްގެ މެމްބަރޝިޕް ރަނގަޅުކޮށްދިން ކަމުގެ މައްސަލަ އެވެ. ބެޑްމިންޓަނުގައި ވެސް ޖެހުނީ މެމްބަރޝިޕުގެ މައްސަލަ އެވެ. އެއީ އެސޯސިއޭޝަންގެ ހިންގާ ގަވައިދާ ހިލާފަށް އަތޮޅު ތަކުގައި ހަރަކާތްތެރިވަމުން އަންނަ ބެޑްމިންޓަން ކޮމިޓީތަކަށް ވޯޓު ދިނުމުގެ ހައްގު ގެއްލޭ ގޮތަށް އިންތިހާބު ބާއްވަން އުޅޭކަމުގެ ޝަކުވާއެވެ.
ނަމަވެސް އެސޯސިއޭޝަނުން ބުނަނީ މި މަހުގެ ތިން ވަނަ ދުވަހާ ހަމައަށް ރިޕޯޓްތައް ހުށަހަޅައި ލިޔެކިއުން ފުރިހަމަކޮށްފައިނުވާ ބަޔަކަށް ވޯޓުލުމުގެ ފުރުސަތު ނުދޭ ކަމަށެވެ.
މިއަދު ހެނދުނު ބާއްވާ ވޮލީ އިންތިހާބުގައި ވާދަކުރައްވަނީ ޑީއާރުޕީގެ ލީޑަރު މުހައްމަދު ނަޝީދު (ކާނަލް) އާއި ވޮލީގެ މިހާރުގެ ރައީސް މުހައްމަދު ރިޔާޒެވެ.
މީގެ ތެރެއިން ކާނަލް ގެންދަނީ އޭނާ އަށް ކެމްޕޭން ކުރަން ފުރުސަތު ނުދޭ ކަމަށާއި އޮޅުވާލައިގެން ގިނަ ކަންތައްތަކެއް ކުރަމުންދާ ކަމަށް ފާހަގަކޮށްފަ އެވެ. ނަމަވެސް ފާއިތުވެދިޔަ އަށް އަހަރު ވޮލީގެ ރައީސްކަމުގައި ހުންނެވި ކުރީގެ އެއްވަނަ ރެފްރީ، ރިޔާޒް އެކަން ދޮގުކުރައްވަ އެވެ.
ބެޑްމިންޓަން އެސޯސިއޭޝަނުގެ ރައީސް ކަމަށް ވަދަކުރައްވަނީ މިހާރުގެ ރައީސް މޫސާ ނާޝިދާއި، ހަސަން ރިޔާޒް (ބަބާ) އެވެ.
ވޮލީގެ މިހާރުގެ ރައީސް މުހައްމަދު ރިޔާޒް (ކ): ދެން ވާދަ ކުރަނީ ކާނަލް