ޔޫއެފާ ޗެމްޕިއަންސް ލީގުގައި ވިދިވިދިގެން ދެ މެޗުން ބަލިވެފައިވާ ބަޔާން މިއުނިކް މިސީޒަނުގައި އެ މުބާރާތުގައި ފުރަތަމަ ފަހަރަށް މޮޅުވެއްޖެ އެވެ.
އިއްޔެ ރޭ އަމިއްލަ ދަނޑު އެލިއަންޒް އެރީނާގައި ޕޯޗުގީޒް ކުލަބް ބެންފީކާއާ ދެކޮޅަށް ކުޅުނު މެޗު އެ ޓީމުން ކާމިޔާބުކުރީ 1-0 ގެ ނަތީޖާއަކުންނެވެ.
ގާތްގަނޑަކަށް 75,000 ސަޕޯޓަރުންގެ ކުރިމަތީގައި ކުޅުނު މި މެޗުގެ ހަމައެކަނި ލަނޑު ޖެހީ 67 ވަނަ މިނެޓުގައި ޖަމާލް މުސިއާލާ އެވެ.
މި ގޯލް ޖެހީ ގޯލު އޭރިއާ ތެރެއިން ހެރީ ކޭން ބޮލުން ޖައްސާލި ބޯޅަ މުސިއާލާ ގޯލަށް ފޮނުވާލައިގެންނެވެ.
މެޗުގެ ދެވަނަ ހާފުގައި ބަދަލު ކުޅުންތެރިއެއްގެ ގޮތުގައި އައި ލެރޯއި ސާނޭ ދެއްކި ރަނގަޅު ކުޅުމުން ބެންފީކާގެ ގޯލަށް ނުރައްކާތެރި ދެ ހަމަލައެއް އެޓީމުން ދިނެވެ. ނަމަވެސް މި ދެ ހަމަލާއިން އިތުރު ގޯލެއް ނުލިބުނީ ބެންފީކާގެ ގޯލް ކީޕަރު އެނެތޮލިއޯ ދެއްކި ފުރިހަމަ ކުޅުމުންނެވެ.
މި މޮޅުވުމާއެކު ބަޔާން މިއުނިކް ވަނީ މި ސީޒަންގެ ޗެމްޕިއަންސް ލީގުގައި ކުޅުނު ހަތަރު މެޗުން ހަ ޕޮއިންޓް ހޯދާފަ އެވެ. މިވަގުތު އެ ޓީމު އޮތީ ޓޭބަލްގެ 17 ވަނައިގައެވެ. ބަޔަން މިއުނިކް އިން ދެން ކުޅޭނީ ފްރާންސްގެ ވަރުގަދަ ކުލަބު ޕީއެސްޖީއާ ދެކޮޅަށެވެ.