އަންނަ އަހަރުގެ ދައުލަތުގެ ބަޖެޓުގައި އަސާސީ ހިދުމަތްތަކުގެ ގޮތުގައި ހިމެނޭ ސަބްސިޑީއާއި އާސަންދަ ފަދަ ހިދުމަތްތައް ވަނީ އުނިކޮށްފައި ކަމަށް އިދިކޮޅު އެންޑީޕީން ބުނެފި އެވެ.
އެމްޑީޕީން މިއަދު ބޭއްވި ނޫސްވެރިންގެ ބައްދަލުވުމެއްގައި އެމްޑީޕީ ސަރުކާރުގެ ފިނޭންސް މިނިސްޓަރު އިބްރާހީމް އަމީރު ވިދާޅުވީ ރައީސް ޑރ. މުހައްމަދު މުއިއްޒުގެ ސަރުކާރުން އަންނަ އަހަރަށް ލަފާކޮށް މަޖިލީހަށް ހުށަހަފައިވާ ބަޖެޓަކީ ރައްޔިތުންނަށް ދެމުން ދިޔަ އަސާސީ ހިދުމަތްތަކަށް ކުރާ ހަރަދު ކުޑަކޮށް ހުށަހަޅާފައިވާ ބަޖެޓެއް ކަމަށެވެ.
"ހަރަދު ކުޑަކުރަން ހުށަހެޅި ބަޖެޓުން އެކަން ވަރަށް ރަނގަޅަށް ފެނިގެންވެސް އެބަދޭ،" އަމީރު ވިދާޅުވި އެވެ.
އޭނާ ވިދާޅުވީ ހަރަދު ކުޑަކުރުމުގެ ގޮތުން ކުޑަކޮށްފައި އޮތީ އަސާސީ ހިދުމަތްތަކަށް ކުރަން ހަމަޖެހިފައިވާ އާސަންދައާއި ސަބްސިޑީގެ ބަޖެޓާއި ކައުންސިލްތަކަށްދޭ ގްރާންޓް އެހީއާއި އުމުރުން ދުވަސް މީހުންގެ އަސާސީ ޕެންޝަން ފައިސާ ކަމަށެވެ. އަދި ގެދޮރުވެރިކަމަށް ހިމަނާފައި އޮތީ މިދިޔަ ތިން އަހަރަށް ވުރެވެސް މަދު އަދަދެއް ކަމަށްވެސް ވިދާޅުވި އެވެ.
އަމީރު ވިދާޅުވީ އަންނަ އަހަރުގެ ބަޖެޓުގައި ބޮޑު ހޭދައެއް އިދާރީ ކަންކަމަށް ހިމަނައިގެން ރިކަރަންޓް ހަރަދު ބޮޑުވާ ގޮތަށް އަދަދުތައް ހިމަނާފައިވުމަކީ ވަރަށް ބޮޑަށް ކަންބޮޑުވާ މައްސަލަައެއް ކަމަށެވެ.
"މިބަޖެޓުން ފެންނަނީ ހަރަދު ބޮޑުވާން ނުޖެހޭ ދިމަދިމާލުން އެތައް ގުނައެއް ހަރަދު ބޮޑުވެ ދަރަނިވެސް ބޮޑު ތަނުން އިތުރުވެފައިވާ ތަން. މިއީ ހަރަދު ބޮޑު ދަރަނިވެސް ބޮޑު ބަޖެޓެއް. އެހެން އަހަރުތަކާ އަޅާބަލާއިރުވެސް ޑެފިސިޓް ބޮޑު ބަޖެޓެއް 2025ގެ ބަޖެޓަކީ،" އަމީރު ވިދާޅުވި އެވެ.
އޭނާ ވިދާޅުވީ ލޯނު ދޫކުރުމާއި ކެޕިޓަލްގެ ގޮތުގައި ސަރުކާރުގެ ކުންފުނިތަކަށް ދެވޭ ފައިސާ ކުރިން ހިމަނާފައިވާނީ ހަރަދެއްގެ ގޮތުގައި ކަމަށެވެ. ނަމަވެސް މި ސަރުކާރުގައި އަންނަ އަހަރުގެ ބަޖެޓުގައި އެކަން އެގޮތަށް ހިމަނާފައި ނުވަތީ ޑެފިސިޓް ކުޑަ ބަޖެޓެއްގެ ގޮތުގައި ދައްކަނީ ކަމަށްވެސް ވިދާޅުވި އެވެ.
އަންނަ އަހަރަށް ލަފާކޮށް ރައްޔިތުންގެ މަޖިލީހަށް ހުށަހަޅާފައިވަނީ 56.6 ބިލިއަން ރުފިޔާގެ ބަޖެޓެކެވެ.