ހެލްތު މިނިސްޓްރީން އިންތިޒާމު ކުރާ "ހެލްތު އެކްސްޕޯ 2024" މިރޭ ހުޅުވައިފި އެވެ.
ހުޅުމާލޭ ސެންޓްރަލް ޕާކުގައި މިރޭ އޮތް ރަސްމިއްޔާތެއްގައި އެކްސްޕޯ ހުޅުއްވައިދެއްވީ ރައީސުލްޖުމްހޫރިއްޔާގެ ނައިބް ހުސައިން މުހައްމަދު ލަތީފް އެވެ.
ހެލްތު އެކްސްޕޯ އަކީ ދުޅަހެޔޮ މުޖުތަމައެއް ބިނާކުރުމަށް ސިއްހީ ދާއިރާއިން ކުރަމުންދާ މަސައްކަތްތަކާއި ސިއްހީ ގޮތުން ދުޅަހެޔޮ އާދަތަކަށް އާންމުން ހޭލުންތެރިކުރުމާ ގުޅޭ މައުލޫމާތު ރައްޔިތުންނަށް ފޯރުކޮށްދިނުމަށް ދެ ދުވަހުގެ މުއްދަތަށް ކުރިއަށް ގެންދާ ހަރަކާތެކެވެ.
ހެލްތު އެކްސްޕޯ 2024 ފެށުމުގެ ގޮތުން ނައިބް ރައީސް ވަނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވެރިކަމުގައި ސިއްހީ ދާއިރާއިން ކޮށްފައިވާ މަސައްކަތްތަކުގެ ވަނަވަރު ހިމެނޭހެން ތައްޔާރުކޮށްފައިވާ "ހަފުތާ 52" އާންމުކޮށްދެއްވާފަ އެވެ.
ނައިބް ރައީސް ވަނީ ހެލްތު އެކްސްޕޯގައި އާންމުންނަށް މައުލޫމާތު ފޯރުކޮށްދިނުމަށް ތައްޔާރުކޮށްފައިވާ ސްޓޯލްތަކަށް ޒިޔާރަތްކުރައްވައި، އެ ސްޓޯލްތައްވެސް ބައްލަވާލައްވާފަ އެވެ.
ހެލްތު އެކްސްޕޯގައި ސިއްހީ ދާއިރާގެ އެކިއެކި ފަރާތްތަކުން ބައިވެރިވެ އެވެ. އެގޮތުން މާލެ ސަރަހައްދުގެ ހޮސްޕިޓަލްތަކާއި، ކްލިނިކްތަކާއި، ޖަމިއްޔާ ޖަމާއަތްތައް ބައިވެރިވާ 50 ސްޓޯލް އެކްސްޕޯގައި ހުއްޓެވެ.