މޯލްޑިވްސް އިސްލާމިކް ބޭންކް (އެމްއައިބީ)ގެ އޭޓީއެމް ހިދުމަތް 19 ރަށަކަށް ފުޅާކުރުމުގެ މަޝްރޫއު މިއަދު އިފްތިތާހު ކޮށްފި އެވެ.
ރައީސް އޮފީހުގައި މިއަދު އޮތް ރަސްމިއްޔާތެއްގައި މިމަޝްރޫއު އިފްތިތާހުކޮށްދެއްވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެވެ.
މި ރަސްމިއްޔާތުގައި ވަނީ އެމްއައިބީގެ އޭޓީއެމް ހިދުމަތް ފުޅާކުރުމާ ބެހޭ ގޮތުން އިކޮނޮމިކް މިނިސްޓްރީއާއި އެމްއައިބީއާ ދެމެދު ވަނީ އެއްބަސްވުމުގައި ސޮއިކޮށްފަ އެވެ.
މިއެއްބަސްވުމުގައި ސޮއިކުރެއްވީ އިކޮނޮމިކް މިނިސްޓަރު މުހައްމަދު ސައީދާއި އެމްއައިބީގެ ޗީފް އެގްޒެކެޓިވް އޮފިސަރު މުފައްދަލް އިދްރީސް ޚުމްރީ އެވެ.
މިއީ ދިވެހިރާއްޖޭގެ މީހުން ދިރިއުޅޭ ހުރިހާ ރަށެއްގައި އޭޓީއެމްގެ ހިދުމަތް ގާއިމުކޮށް، ހުރިހާ ދިވެހި ރައްޔިތުންނަށް ގާތުން އަދި ފަސޭހަކަމާއެކު ބޭންކިން ހިދުމަތްތައް ފޯރުކޮށްދިނުމަށް ރައީސް މުއިއްޒު ވެވަޑައިގެންނެވި ރިޔާސީ ވައުދު ފުއްދުމަށް ކުރިއަށް ގެންދާ މަސައްކަތެކެވެ.
މިހާރު 12 އަތޮޅުގެ 18 ރަށެއްގައި އެމްއައިބީގެ 39 އޭޓީއެމް ގާއިމުކޮށްފައިވެ އެވެ. އަންނަ އަހަރުގެ ނިޔަލަށް އެމްއައިބީގެ އިތުރު 23 އޭޓީއެމް އެކި ރަށްރަށުގައި ގާއިމުކުރުމަށް ހަމަޖެހިފައިވެ އެވެ.
މި މަޝްރޫއު ނިމޭއިރު އެމްއައިބީގެ އޭޓީއެމްގެ ހިދުމަތް 16 އަތޮޅެއްގެ 37 ރަށަކަށް ފޯރުކޮށްދެވޭނެ ކަމަށް އެ ބޭންކުން ބުނެ އެވެ.