އަތޮޅުތަކުން މާލެއަށް ދަތުރުކުރާ ލޯންޗު ފެރީތަކަށް ހެންވޭރު ފެރީ ޓާމިނަލް ހުޅުވާލައިފި އެވެ.
ލޯންޗް ފެރީތަކަށް ހެންވޭރު ފެރީ ޓާމިނަލުން ހިދުމަތް ފޯރުކޮށްދޭން ފަށާފައިވަނީ މިއަދު ބޭއްވި ރަސްމިއްޔާތެއްގަ އެވެ.
މި ރަސްމިއްޔާތުގައި އެމްޓީސީސީގެ މެނޭޖިން ޑިރެކްޓަރު (ރިޓަޔަޑް) ޑެޕިއުޓީ ކޮމިޝަނާ އޮފް ޕޮލިސް އަހުމަދު ސައުދީ ވިދާޅުވީ ހެންވޭރު ފެރީ ޓާމިނަލަކީ ހުޅުލޭގެ އިތުރުން ކްރޮސްރޯޑަށް ދަތުރުކުރާ ފެރީތައް ބޭނުންކުރާ ޓާމިނަލެއް ނަމަވެސް އަތޮޅުތަކުގެ ލޯންޗްތަކުގެ ޝެޑިއުލް ލިބުމުން އެވަގުތުތަކަށް އެތަނުން ފަސޭހައިން ހިދުމަތް ލިބޭނެ ކަމަށެވެ.
ހެންވޭރު ފެރީ ޓާމިނަލަށް އެއް ފަހަރާ ފަސް ލޯންޗް ކައިރި ކުރެވޭނެ ޖާގަ ހަމަޖައްސާފައިވާއިރު ހުޅުމާލޭ ޓާމިނަލުން އެއްފަހަރާ ތިން ލޯންޗު ކައިރި ކުރެވޭނެ ޖާގަ ވަނީ ހަމަޖައްސާފަ އެވެ.
އުޅަނދު ޖެޓީއަށް ލަފާ ހިސާބުން ފެށިގެން ފުރުމާދެމެދު 30 މިނެޓްގެ ވަގުތެއް ލިބޭއިރު ދަތުރުވެރިންނަށް ޓާމިނަލްގައި މަޑުކޮށްލުމަށް ހާއްސަ ސަރަހައްދެއް އިންތިޒާމު ކުރެވޭނެ ކަމަށް އެމްޓީސީސީ އިން ބުނެފައިވެ އެވެ.
ފެރީ ޓާމިނަލްތައް ލޯންޗު ފެރީތަކަށް ހުޅުވާލަން ނިންމެވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒެވެ.
