ތެލެސީމިއާ ސެންޓަރު ބަދަލުކުރުމަށް ކަނޑައަޅާފައިވާ ހުޅުމާލެ "އޮރެންޖް ހިޔާ" ގެ މަސައްކަތް މިމަހުގެ ނިޔަލަށް ނިމޭނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
"ރައްޔިތުންނާ އެކު" ގެ ނަމުގައި ގެނެސްދިން ޕޮޑްކާސްޓްގައި ރައީސް މުއިއްޒު ވިދާޅުވީ "އޮރެންޖް ހިޔާ" ގެ މަސައްކަތް ވަރަށް ބާރަށް ކުރިއަށްދާ ކަމަށާއި އެ މަސައްކަތް މިމަހުގެ 30 ވަނަ ދުވަހުގެ ނިޔަލަށް ސިފައިން ނިންމާނެ ކަމަށެވެ.
ރައީސް މުއިއްޒު ވަނީ ދުނިޔޭގެ ތެލެސީމިއާ ދުވަހުގެ ގޮތުގައި ފާހަގަކުރާ މޭ 8 ގެ ކުރިން މާލޭގައި ހުރި ތެލެސީމިއާ މަރުކަޒު ހުޅުމާލެއަށް ބަދަލުކުރެވޭނެ ކަމަށް ވިދާޅުވެފަ އެވެ.
މާލޭގަައި ހުރި ތެލެސީމިއާ ސެންޓަރަކީ ޖާގައިގެ ގޮތުން ދަތި ތަނެއް ނަމަވެސް އޮރެންޖް ހިޔާއަކީ ޖާގަ ތަނަވަސްތަނެއްކަން ރައީސް ވަނީ ފާހަގަކުރައްވާފަ އެވެ.
ތެލެސީމިއާ ސެންޓަރުގެ މަސައްކަތް ނިންމަން ސިފައިންނާ ހަވާލުކުރީ މިދިޔަ މަހުގެ 28 ވަނަ ދުވަހު އެވެ.
"އޮރެންޖް ހިޔާ" އިން ތެލަސީމިއާގެ ހިދުމަތް ފޯރުކޮށްދޭން ފެށުމުން ހިދުމަތް ހޯދާ ފަރާތްތައް އެތަނަށް ދަތުރުކުރުމަށް އެމްޓީސީސީގެ ބަސްހުއްޓިއެއް ހަމަޖެއްސުމާއެކު ހިލޭ ދަތުރުކުރެވޭނެ އިންތިޒާމް ހަމަޖެހިގެންދާނެ ކަމަށްވެސް ރައީސް މުއިއްޒު ވަނީ މީގެ ކުރިން ވިދާޅުވެފަ އެވެ.
