ތެލެސީމިއާ ސެންޓަރު ބަދަލުކުރުމަށް ކަނޑައަޅާފައިވާ ހުޅުމާލެ "އޮރެންޖް ހިޔާ" ގެ މަސައްކަތް ނިންމަން ސިފައިންނާ ހަވާލުކޮށްފި އެވެ.
"ރައްޔިތުންނާ އެކު" ގެ ނަމުގައި ގެނެސްދިން ޕޮޑްކާސްޓްގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ މިހާރު ތެލަސީމިއާ ސެންޓަރު ހިންގާ އިމާރާތުގައި ކަންބޮޑުވުން ހުރިކަން ފާހަގަކުރައްވާ ތެލަސީމިއާ ސެންޓަރުގެ ހާލަތު ރަނގަޅުކުރުމަށް މަސައްކަތްތަކެއް ކުރުމަށް ނިންމާފައިވާ ކަމަށް ވިދާޅުވެފަ އެވެ.
އެ ގޮތުން ތެލެސީމިއާ ސެންޓަރު ބަދަލުކުރުމަށް ކަނޑައަޅާފައިވާ "އޮރެންޖް ހިޔާ" ގެ މަސައްކަތުގެ ބޮޑު ބައެއް އަދިވެސް ނުނިމޭ ކަމަށް ރައީސް ވިދާޅުވި އެވެ.
"އެތަނުގެ މަސައްކަތުގެ، ބޮޑު ބައެއް އަދިވެސް ނުނިމޭތީއާއެކު އަދި ކޮންޓްރެކްޓްވެސް ހަމަވާތީ މިމަހުގެ 28 ވަނަ ދުވަހުން ފެށިގެން އެތަން ނިންމުމުގެ މަސައްކަތް ޤައުމީ ކަމެއްގެ ގޮތުގައި ކުރިއަށްގެންދިއުމަށް ސިފައިންނާ ވަނީ ހަވާލުކޮށްފަ،" ރައީސް މުއިއްޒު ވިދާޅުވި އެވެ.
މި މަސައްކަތް ހަވާލުކުރީ އެއް މަސް ދުވަހުގެ ތެރޭގައި ނިންމުމަށް ކަމަށް ރައީސް ވިދާޅުވި އެވެ.
"އޮރެންޖް ހިޔާ" އިން ތެލަސީމިއާގެ ހިދުމަތް ފޯރުކޮށްދޭން ފެށުމުން ހިދުމަތް ހޯދާ ފަރާތްތައް އެތަނަށް ދަތުރުކުރުމަށް އެމްޓީސީސީގެ ބަސްހުއްޓިއެއް ހަމަޖެއްސުމާއެކު ހިލޭ ދަތުރުކުރެވޭނެ އިންތިޒާމް ހަމަޖެހިގެންދާނެ ކަމަށްވެސް ރައީސް ވިދާޅުވި އެވެ.
ޕޮޑްކާސްޓުގައި ރައީސް މުއިއްޒު ވަނީ ތެލަސީމިއާ ސެންޓަރަށް ވަސީލަތްތައް ހަމަކުރުމުގެ މަސައްކަތް ކުރައްވަމުން ގެންދަވާ ކަމަށް ވިދާޅުވެފަ އެވެ.
