ފެނަބާޗޭގެ ކޯޗު ހޯސޭ މޮރީނިއޯ ކުޅިވަރުގެ ރޫހާ ހިލާފު އަމަލެއް ހިންގުމުން އެއް މެޗުގެ ސަސްޕެންޝަނަކާއެކު 18,000 ޑޮލަރުން ޖޫރިމަނާ ކުރަން ތުރުކީ ފުޓްބޯޅަ ފެޑެރޭޝަނުން ނިންމައިފި އެވެ.
މި ފިޔަވަޅު އަޅާފައިވަނީ ތުރުކީ ސުޕަ ލީގުގައި ފެނަބާޗޭ އިން ޓްރަބްޒޯންސްޕޯއާ ދެކޮޅަށް ކުޅުނު މެޗުގައި މޮރީނިއޯ އަމަލުކުރި ގޮތަކުންނެވެ.
މި މެޗުގައި ފެނަބާޗޭ އިން 3-2 އިން މޮޅުވެފައިވަނީ އިތުރު ވަގުތުގައި ސޯފްޔަން އަމްރަބަޓް ޖެހި ލަނޑަކުންނެވެ.
މި ލަނޑު ޖެހުމާ ގުޅިގެން މޮރީނިއޯ ދަނޑަށް އަރައި އުފާފާޅުކުރުމަށްފަހު ޓަނަލަށް ވަންނަމުން ސަޕޯޓަރުންނަށް އިޝާރާތްކޮށް އުފާފާޅުކުރި ގޮތުން ސަޕޯޓަރުން އޭނާއާ ދިމާލަށް އެއްޗެހި އުކާފައިވެ އެވެ.
މީގެއިތުރުން މެޗަށްފަހު ނޫސްވެރިންނާ ބައްދަލުކުރުމަށްފަހު މޮރީނިއޯ ވަނީ ރެފްރީންނަށް ވަރަށް ބޮޑަށް ފާޑުކިޔާފަ އެވެ.
މޮރީނިއޯ ހިތްހަމަނުޖެހުނީ ވީއޭއާރް އިން ބަލައި، ޓްރަބްޒޯންސްޕޯ އަށް ދެ ޕެނަލްޓީ ދިނުމާއެކު، ފެނަބާޗޭ އަށް ދޭންޖެހޭ ޕެނަލްޓީއެއް ނުދިނުމާ ގުޅިގެންނެވެ.
ތުރުކީ ފުޓްބޯޅަ ފެޑެރޭޝަނުން ބުނެފައިވާ ގޮތުގައި މޮރީނިއޯ އަމަލުކޮށްފައިވަނީ ކުޅިވަރުގެ ރޫހާއި ތުރުކީ ފުޓްބޯޅައިގެ އުސޫލުތަކާ ހިލާފަށެވެ.