މިނިސްޓަރ އޮފް ފޮރިން އެފެއާޒް ޑރ. އަބްދުﷲ ޚަލީލް މިއަދު ސައުދި އަރަބިއްޔާއަށް ވަޑައިގެންފި އެވެ.
ޚަލީލްގެ މިދަތުރުފުޅަކީ ސައުދި އަރަބިއްޔާ އިން އިސްނަގައިގެން ބާއްވާ އަރަބި-އިސްލާމީ ސަމިޓާއި އޭގެ ތައްޔާރީ ބައްދަލުވުންތަކުގައި ބައިވެރިވެ ވަޑައިގަތުމަށް ކުރައްވާ ދަތުރުފުޅެކެވެ.
އެކްސްގައި ކުރެއްވި ޕޯސްޓެއްގައި ހަލީލް ވިދާޅުވީ އިސްލާމީ އުއްމަތަށް ކުރިމަތިވެފައިވާ ގޮންޖެހުންތަކާ ގުޅޭގޮތުން އަރަބި-އިސްލާމީ ގައުމުތަކާއެކު މި ސަމިޓްގައި މަޝްވަރާކުރައްވާނެ ކަމަށެވެ. ހާއްސަކޮށް ފަލަސްތީންގެ ރައްޔިތުން ތަހައްމަލް ކުރަމުންދާ ހިތްދަތިކަަމަށް ލުއިތަކެއް ހޯދުމަށް މަޝްވަރާ ކުރައްވާނެ ކަމަށްވެސް ވިދާޅުވި އެވެ.
މިނިސްޓަރު ހަލީލް ވިދާޅުވީ ފަލަސްތީންގެ ރައްޔިތުންނަށް ކުރިމަތިވެފައިވާ ދަތިތައް ލުއިކޮށްދިނުމަށާއި އިޒުރޭލު ޖަވާބުދާރީ ކުރުވުމަށް އެންމެން އެއްބައެއްގެ ގޮތުގައި މަސައްކަތް ކުރަންޖެހޭ ކަމަށެވެ. އަދި އިޒުރޭލުން ކުރިއަށް ގެންދާ އަނިޔާވެރި ހަނގުރާމައާއި ނަސްލު ނައްތާލުމުގެ އަމަލުތައް ވަގުތުން ހުއްޓާލަންޖެހޭ ކަމަށްވެސް ވިދާޅުވި އެވެ.