ބައެއް ރަށްތަކުގައި މަޝްރޫއުތަކެއް ހިންގުމަށް ދިވެހި ސަރުކާރާއި އިންޑިއާ ސަރުކާރުން އެއްބަސްވުމެއްގައި ސޮއިކޮށްފި އެވެ.
ދެ ސަރުކާރުން އެއްބަސްވުމެއްގައި މިއަދު ސޮއި ކުރީ ދެ ގައުމުގެ ހާރިޖީ ވަޒީރުން މިއަދު އިންޑިއާގައި ބޭއްވެވި ރަސްމީ ބައްދަލުވުމުގައެވެ.
"ހައި އިމްޕެކްޓް ކޮމިއުނިޓީ ޑިވެލޮޕްމަންޓް ޕްރޮޖެކްޓްސް" އެއްބަސްވުމުގައި ރާއްޖޭގެ ފަރާތުން ސޮއި ކުރެއްވީ ރާއްޖޭގެ ފޮރިން މިނިސްޓަރު ޑރ. އަބްދުﷲ ހަލީލް އެވެ. އިންޑިއާ ސަރުކާރުގެ ފަރާތުން ސޮއި ކުރެއްވީ އެ ގައުމުގެ ހާރިޖީ ވަޒީރު ޑރ. އެސް ޖައިޝަންކަރު އެވެ.
އިންޑިއާ އާއި ރާއްޖެއާ ދެމެދު ސޮއި ކުރި މިއެއްބަސްވުމުގެ ދަށުން މީގެކުރިންވެސް ރާއްޖޭގައި ބައެއް މަޝްރޫއުތައް ހިންގާފައިވެ އެވެ.
ޑރ. ޚަލީލް އިންޑިއާއަށް މިހާރު ކުރައްވަމުން ގެންދަވާ ދަތުރުފުޅަކީ މިދިޔަ ސެޕްޓެމްބަރު މަހު މަގާމާ ހަވާލުވެވަޑައިގެންނެވި ފަހުން އެ ގައުމަށް ކުރައްވާ ފުރަތަމަ ރަސްމީ ދަތުރުފުޅެވެ.
ޑރ. ޖައިޝަންކަރު މިއަދު ވިދާޅުވީ ރާއްޖެއަކީ އަވައްޓެރި ގައުމުތަކަށް އިސްކަން ދިނުމަށް އިންޑިއާ އިން ގެންގުޅޭ "ނެއިބަހުޑް ފަސްޓް" ސިޔާސަތުގެ އެންމެ ސާފު މިސާލުގެ ގޮތުގައި ސިފަކުރައްވާފަ އެވެ.
ޑރ. ޚަލީލް ވަނީ ރާއްޖޭގެ އިގްތިސާދަށް ކުރިމަތިވެފައިވާ މައްސަލަތަކަށް ހައްލު ހޯދުމަށް ދިވެހި ސަރުކާރުން ކުރާ މަސައްކަތުގައި އިންޑިއާ އިން އެހީވާތީ ޝުކުރު އަދާކުރައްވާފަ އެވެ.