ޖަމާއަތް ހަދައިގެން ތޫނު ހަތިޔާރު ބޭނުންކޮށްގެން މާރާމާރީ ހިންގި ބަޔަކު ހައްޔަރުކޮށްފި އެވެ.
މިމައްސަލައިގައި ހައްޔަރުކޮށްފައިވަނީ މާލެއަށް ނިސްބަތްވާ 21 އަހަރުގެ މީހަކާއި، ނ. މަނަދޫއަށް ނިސްބަތްވާ 22 އަހަރުގެ މީހަކާއި، އއ. މާޅޮހަށް ނިސްބަތްވާ 23 އަހަރުގެ މީހަކާ އަދި ގދ. ވާދޫއަށް ނިސްބަތްވާ 21 އަހަރުގެ މީހެކެވެ. މި އެންމެންނަކީ ފިރިހެނުންނެވެ.
މި މީހުންގެ ބަންދާ މެދު ގޮތެއް ނިންމުމަށް މިދިޔަ ބުދަ ދުވަހު ކޯޓަށް ހާޒިރުކުރުމުން ކޯޓުން ވަނީ މި އެންމެން ތަހުގީގު ނިމެންދެން ބަންދުގައި ބެހެއްޓުމަށް އަމުރުކޮށްފަ އެވެ.
ކޯޓު އަމުރުގައިވާ ގޮތުން މި މީހުން މައްޗަށް ކުށް ސާބިތުކުރެވޭ މިންވަރަށް ފުލުހުންގެ ފަރާތުން ހެއްކާއި ގަރީނާ ހުށަހަޅާފައިވެ އެވެ. މީގެތެރޭގައި ތަހުގީގީ ބަޔާންތަކާއި، ސީސީޓީވީ ފޫޓޭޖްގެ ސްނެޕްޝޮޓްތަކާއި، އިންޓަލިޖެންސް ރިޕޯޓްގެ އިތުރުން އެހެން ބައެއް ހެކި ހުށަހަޅާފައިވެ އެވެ.
މާރާމާރީ ހިންގުމަށްފަހު ފިލަންވެގެން މި އެންމެން އެކީގައި ރަށަކަށް ގޮސްފައިވާތީ މިއީ ޖަމާއަތް ހަދައިގެން ކުށުގެ އަމަލުތަކެއް ހިންގި ބައެއް ކަމަށް ފުލުހުން ތުހުމަތު ކުރެ އެވެ.
ޖަމާއަތް ހަދައިގެން މާރާމާރީ ހިންގުމުގެ ކުށުގައި ފުލުހުން ހައްޔަރުކޮށްފައިވާ ހަތަރު މީހުންނަކީ ވެސް އެކި ކުށްތަކުގެ ރެކޯޑް އޮތް ބައެކެވެ.