ސްޕެނިޝް ލަ ލީގާގައި ރެއާލް މެޑްރިޑާއި އޮސަސޫނާ ރޭ ބައްދަލުކުރި 4-0 އިން ރެއާލް އިން ކާމިޔާބުކޮށްފި އެވެ.
ސެންޓިއާގޯ ބަނަބިއު ސްޓޭޑިއަމްގައި 72,000 އަށް ވުރެ ގިނަ ސަޕޯޓަރުންގެ ކުރިމަތީގައި ކުޅުނު މި މެޗުގައި، މެޑްރިޑްގެ ތަރި ވިނިސިއަސް ޖޫނިއަ ވަނީ ހެޓްރިކެއް ހަދާފަ އެވެ. މިއީ މި ސީޒަންގައި އޭނާ ހެދި ދެވަނަ ހެޓްރިކެވެ.
މެޗުގެ ފުރަތަމަ ލަނޑު 34 ވަނަ މިނެޓުގައި ވިނިސިއަސް ޖެހުމަށްފަހު، ފުރަތަމަ ހާފު ނިމުމުގެ ކުރިން އިނގިރޭސި މިޑްފީލްޑަރު ޖޫޑް ބެލިންހަމް ވަނީ އެ ޓީމުގެ ދެވަނަ ލަނޑު ޖަހާލާފަ އެވެ. މިއީ މި ސީޒަންގައި ބެލިންހަމް ކާމިޔާބުކުރި ފުރަތަމަ ލަނޑެވެ.
މެޗުގެ ދެވަނަ ހާފުގައި ވިނިސިއަސް ވަނީ އިތުރު ދެ ލަނޑު ޖަހައި، އޭނާގެ ހެޓްރިކް ފުރިހަމަކޮށްފަ އެވެ.
މި މެޗު ކާމިޔާބުކުރުމާއެކު ރެއާލް މެޑްރިޑް ވަނީ 12 މެޗުން 27 ޕޮއިންޓާއެކު ލީގު ތާވަލުގެ ދެވަނައަށް އަރާފަ އެވެ. އެއްވަނައިގައި އޮތް ބާސެލޯނާ އަށް ވަނީ 12 މެޗުން 33 ޕޮއިންޓް ލިބިފަ އެވެ.
މިމެޗުގެ 30 ވަނަ މިނެޓުގައި މެޑްރިޑްގެ ތަރި އެޑާ މިލިޓާއޯގެ ލިގަމެންޓަށް ލިބުނު އަނިޔާއެއްގެ ސަބަބުން އޭނާ ވަނީ މި މެޗުން ބާލަންވެސް ޖެހިފަ އެވެ.
ރެއާލް އިން ބުނެފައިވާ ގޮތުގައި އޭނާގެ ފައިގެ ސާޖަރީއެއް ވަރަށް އަވަހަށް ހަދަން ޖެހޭނެ އެވެ.
މެޗަށްފަހު ވާހަކަދެއްކި ރެއާލް މެޑްރިޑްގެ ކޯޗު ކާލޯ އެންޗެލޮއްޓީ ވަނީ މެޗުތައް ކައިރި ކައިރީގައި ކުޅެންޖެހުމުގެ ސަބަބުން ކުޅުންތެރިންނަށް އަނިޔާގެ މައްސަލަ ދިމާވަމުންދާ ކަމަށާއި، މިއީ ހުރިހާ ކްލަބުތަކަށްވެސް ދިމާވާ މައްސަލައެއް ކަމަށް ބުނެ ކަންބޮޑުވުން ފާޅުކޮށްފަ އެވެ.