އިނގިރޭސި ޕްރިމިއާ ލީގުގައި ލިވަޕޫލް އިން އެސްޓަން ވިލާ 2-0 އިން ބަލިކޮށް، ލީގު ތާވަލުގެ އެއްވަނައިގައި ފަސް ޕޮއިންޓުގެ ލީޑެއް ހޯދައިގެން ހަމަޖެހިލައިފި އެވެ.
އެންފީލްޑްގައި ރޭ ކުޅުނު މި މެޗުގައި ލިވަޕޫލްގެ ފުރަތަމަ ލަނޑު 20 ވަނަ މިނެޓުގައި ޖެހީ ޑާވިން ނޫނޭޒް އެވެ.
މިއީ މި ސީޒަންގެ ލީގުގައި އޭނާ ޖެހި ދެވަނަ ލަނޑެވެ. ދެވަނަ ލަނޑު މެޗު ނިމުމުގެ ކުރިން މުހައްމަދު ސަލާހު ވަނީ ޖަހާފަ އެވެ. މި ލަނޑާއެކު ސަލާހު ވަނީ އޭނާ އެންމެ ފަހުން ކުޅުނު ހަތަރު މެޗުގައިވެސް ލަނޑު ޖަހާފަ އެވެ.
މި މެޗުން މޮޅުވުމާއެކު ލިވަޕޫލް ވަނީ 11 މެޗުން 28 ޕޮއިންޓާއެކު ލީގު ތާވަލުގެ އެއްވަނައަށް އަރާފަ އެވެ.
ދެވަނައިގައި އޮތް މެންޗެސްޓާ ސިޓީއަށް 11 މެޗުން ލިބިފައިވަނީ 23 ޕޮއިންޓެވެ. ތިންވަނަ އަދި ހަތަރުވަނައިގައިވާ ނޮޓިންހަމް އާއި ބްރައިޓަން އަށް ލިބިފައިވަނީ 19 ޕޮއިންޓެވެ.
ލިވަޕޫލްގެ އާ ކޯޗު ސްލޮޓްގެ އިރުޝާދުގެ ދަށުން ލިވަޕޫލް އިން ވަނީ މިހާތަނަށް ކުޅުނު 17 މެޗުގެ ތެރެއިން 15 މެޗުން މޮޅުވެފަ އެވެ. އަދި ލީގުގައި ކުޅުނު 11 މެޗުގެ ތެރެއިން 9 މެޗުން އެ ޓީމުން ވަނީ މޮޅުވެފަ އެވެ.