އެމެރިކާގައި ނޮވެމްބަރު ފަހެއްގައި އޮތް ރިޔާސީ އިންތިހާބަށް ފަހު، އިންތިހާބީ ރައީސް ޑޮނަލްޑް ޓްރަމްޕްއަށް ތިން ފަހަރު ގުޅުއްވި ކަމަށް އިޒުރޭލުގެ ބޮޑުވަޒީރު ބެންޖަމިން ނަތަންޔާހޫ ވިދާޅުވެއްޖެ އެވެ.
ނަތަންޔާހޫ ވިދާޅުވި ގޮތުގައި މަދު ދުވަސްކޮޅެއްގެ ތެރޭގައި އެހާ ގިނައިން ޓްރަމްޕަށް ގުޅުއްވަން ޖެހިވަޑައިގަތީ ދެ ގައުމުގެ ދެމެދުގައި ހުރި ހިލާފުތައް ސާފުކުރެއްވުމަށެވެ. އަދި މެދުއިރުމަތީގައި އިޒުރޭލުގެ ދައުރާ ބެހޭ ގޮތުން މަޝްވަރާކުރެއްވުމަށެވެ.
ޓްރަމްޕަށް އެރުވި މައުލޫމާތުގެ ތެރޭގައި އީރާނުން އިޒުރޭލަށް ދީފާނެ ހަމަލާތަކާ ބެހޭ އިންޓެލިޖެންސް މައުލޫމާތު ހިމެނޭ ކަމަށް ނަތަންޔާހޫ ވިދާޅުވި އެވެ. އަދި އެމެރިކާއާ އިޒުރޭލުގެ ގުޅިން އީރާން ސައިޒުކުރާނެ އުކުޅުތަކެއް ރޭއްވެވި ކަމަށްވެސް ވިދާޅުވި އެވެ.
އިޒުރޭލު ދެމިއޮތުމާއި ތަރައްގީއަށް ކުރެވެން ހުރި މަސައްކަތްތަކާ ބެހޭ ގޮތުން މަޝްވަރާކުރެއްވި ކަމަށްވެސް ނަތަންޔާހޫ ވިދާޅުވި އެވެ. އަދި އިޒުރޭލުގެ ހައިސިއްޔަތު ފުޅާކޮށް ސަރަހައްދީ ބޮޑު ބާރެއް ގޮތުގައި ދެމިއޮތުމާ ބެހޭ ގޮތުން މަޝްވަރާކުރެއްވި ކަމަށްވެސް އޭނާ ވިދާޅުވި އެވެ.
އެމެރިކާގެ ރިޔާސީ އިންތިޚާބުގައި ޓްރަމްޕް ހޯއްދެވި ކާމިޔާބީއަށް މަރުހަބާ ދަންނަވައި ނަތަންޔާހޫ ވިދާޅުވީ އެއީ އިޒުރޭލަށް ވެސް ބޮޑު ކާމިޔާބެއް ކަމަށެވެ.
ޑޮނަލްޑް ޓްރަމްޕް އެމެރިކާގެ ވެރިކަމާ ހަވާލުވެވަޑައިގަތުމަކީ ދުނިޔެއަށް އިންގިލާބެއް ކަމަށް ވިދާޅުވެ، ނަތަންޔާހޫ ވިދާޅުވީ އިޒުރޭލު ދެމިއޮތުމަށް އެމެރިކާއާ މަޝްވަރާކުރައްވާނެ ކަމަށެެވެ.
ޓްރަމްޕް ވަނީ މީގެ ކުރިންވެސް އެމެރިކާގެ ރައީސްގެ މަގާމު އަދާކުރައްވާފަ އެވެ. އެއީ 2017 – 2020 އަށެވެ. އޭނާގެ ފުރަތަމަ ދައުރުގައި އިޒުރޭލާ އެކު ވަރަށް ގާތް ގުޅުމެއް ބޭއްވެވި އެވެ. އަދި އެމެރިކާގެ އެމްބަސީ ތެލްއަވީވުން ގުދުސްއަށް ވެސް ބަދަލުކުރެއްވި އެވެ.
މިއީ އިޒުރޭލުގެ ވެރިރަށް ގުދުސްއަށް ހެދުމަށް އެމެރިކާއާ އިޒުރޭލު ވިސްނާފައި އޮތް ވިސްނުން ތަންފީޒުކުރެއްވުމަށް ހިންގެވި ހަރަކާތެކެވެ. މި ބަދަލާ އެކު ތެލްއަވީވުގައި އެމްބަސީ ގާއިމުކޮށްފައި ހުރި ބައެއް ގައުމުތަކުން ގުދުސްއަށް އެމްބަސީތައް ބަދަލުކުރި އެވެ.