ސީ ޓު އެއާ ކާގޯ ހިދުމަތާ ގުޅުނު ބްރިޓިޝް އެއާވޭސްގެ ފްލައިޓެއްގައި 8.2 ޓަނުގެ މުދާ ކެނެޑާއަށް ފޮނުވައިފި އެވެ.
މި ހިދުމަތަކީ ކަނޑު މަގުން ރާއްޖެއަށް އަންނަ މުދާ ޓުރާންސިޓުކޮށް ވައިގެ މަގުން ދުނިޔޭގެ އެހެން ގައުމުތަކަށް ފޮނުވުމެވެ.
ބްރިޓިޝް އެއާވޭސް މެދުވެރިކޮށް ކެނެޑާއަށް ފޮނުވި މުދަލަކީ ސްރީލަންކާ އިން ރާއްޖެ ގެނެސްފައިވާ މުދާތަކެކެވެ. ބްރިޓިޝް އެއާވޭސްއަކީ ސީ ޓު އެއާ ކާގޯ ހިދުމަތާ ގުޅުނު 11 ވަނަ އެއާލައިން އެވެ.
ސީ ޓު އެއާ ކާގޯ ހިދުމަތް ރާޢްޖޭގައި ފެށުމުގެ ގޮތުން މޯލްޑިވްސް ޕޯޓްސް ލިމިޓެޑް (އެމްޕީއެލް) އާއެކު ފުރަތަމަ އެއްބަސްވުމެއްގައި ސޮއިކުރީ ޓާކިޝް އެއާލައިނުން މި އަހަރުގެ މާޗް މަހު އެވެ. އެއަށްފަހު ފުރަތަމަ ކާގޯ ޝިޕްމަންޓް ފޮނުވީ މި އަހަރުގެ މެއި މަހު އެވެ.
އެމްޕީއެލްގެ ސީއީއޯ މުހައްމަދު ވަޖީހު އިސްމާއިލް ވިދާޅުވި ގޮތުގައި ކުޑަ ދުވަސްކޮޅު ތެރޭ މި ހިދުމަތުގެ ޑިމާންޑު ވަރަށް ބޮޑަށް ވަނީ އިތުރުވެފަ އެވެ.
އެ ގޮތުން ނިމިދިޔަ އޮކްޓޫބަރު މަހު އެކަނިވެސް 96 ކޮންޓެއިނާ (418 ޓަނުގެ މުދާ / 34946 ދާގީނާ) ގެ މުދާ ވައިގެ މަގުން ރާއްޖެއިން ބޭރަށް ފޮނުވާފައިވާ ކަމަށް އޭނާ ވިދާޅުވި އެވެ.